Hnèna chunga lawmthu hrilna
Davida ta.
144
1 Ka Lungpui LALPA inpâk ro,Indo dàn a mi’n chŭktir a,
Râl tâwn dàn a mi’n chŭktir bok.
2 Ka Pathien dit, ka kulpui nghet,
Ka kulbing sang, ka’n humhimna,
Ka phaw le ka himna a na,
Hnam danghai le ka mihai khom,
Ka thuhnuoia sietu a nih.
3 Mihriem hi iem a na LALPA,
I ngaituo êm êm hlak a na?
Mihriem naupa khom iem a na,
Hieng ang khopa i’n voi el hi?
4 Mihriem hi thuok ang chauh a na,
A dam sung khom hlim thla anga,
Ral nawk el hlak ang hi a nih.
5 Aw LALPA, vànhai kei kûr la,
Nang khom hnuoiah hung trum thla la,
Tlânghai them la, khu lui lui sien,
6 Trêkin hmêlmahai dêng dar la,
I thal kâp la, tlân se raw se.
7 Vàn sânga inthok zuk ban la,
Tuipui inthŭka inthokin,
Mi la suokin mi san him rawh,
Hnam danghai kuta inthokin.
8 Chuong mihai chu an khĕlhlip a,
Inhlêmnan kut chang tieng an phar.a
9 Tringtrang hrui sawm rimawi remin,
I ta di’n hla thar sak ka tih;
10 Lalhai kuomah hnènâ i pêk,
I siehlaw Davida ngei khom,
Kawlhnâm ngei a’nthok i san him.
11 Hnam danghai kuta inthokin,
Mi san suokin mi hum him rawh.
Chuong mihai chu an khĕlhlip a,
Inhlêmna’n kut chang tieng an phar.
12 Kan naupahai tleirawl hunah,
Thing tuoi ang inthrang duong hai sien,
Kan naunuhai khom lal in ban,
Mawi taka ker ang ni raw se.
13 Kan bu inhai chu vŭm hnûrin,
Thlai ra tinrêngin sip sien la,
Kan rama kan beramhai khom,
A sâng a sîngin pung hai sien,
14 Kan bawngchalhai thau thra raw se.
Inrok insuom reng um naw sien,
Kan kotthlĕrah beidong khĕk ri,
Hriet ni naw hrim hrim bok raw se.
15 Chuong anga malsawmna dongtu,
Hnamhai chu an va hamthra de!
Pathien LALPA-a neitu chu,
Hnam vangnei le hamthra an nih.