Thrangpui hnǐna
Davida inpakna hla
143
1 LALPA, ka trongtrai ngaithla la,I ringum leiin ka hnǐna,
I nä sitin ngaithla hrăm la,
I’n dik leiin mi hung don rawh.
2 I siehlaw chungah rorêlna,
Potchat inhmawpêk naw hrăm rawh,
I hmaah hringmi tu el khom,
Thiem chang thei ding an um si nawh.
3 Hmêlmain a mi pêl zing a,
Thĕ thluin a mi sop ziel a,
Tiena tlânga fam tah angin,
Hmun thim a mi’n nghăktir a nih.
4 Chuleiin ka thlä a ngŭi a,
Ka lungril a chi-ăi a nih.
5 Hun liem ta hnung ka thlǐr kǐr a,
I thilthawhai sui neu neuin,
I kutsuokhai ka dawnkhawl hlak.
6 I tieng ka kut ka hung phar a,
Hnuoi chăr, tui ngaia dang inhil
Iengin ka thlä hin a ngai che.
7 Aw LALPA mi hung don vat rawh,
Ka thlá a chau hâwp a ni hi!
Ka lakah i hmêl thup naw rawh,
Chuong an naw chun khuorkhurûma,
Tla ang el ka ni ding a nih.
8 I hmangaina chuoi ngai lo chu,
Tûk tinin min hriet nontir la,
Ka ringsan tak chu nang i na,
Ka lam hraw ding mi kawkhmu rawh,
Ka thlä i tieng a hung ngha hi.
9 Ka hmêlmahai kut a’nthokin,
LALPA, nangin mi san suok la,
Nang chu ka’n bǐkna i ni si.
10 I ditzawng thaw mi’n chûktir la,
Nang chu ka Pathien i ni si.
I thlarau ditum tak el chun,
Lam tluong zălah mi thruoi pei rawh.
11 I hming leiin aw ka LALPA,
Ka hringnun hi mi humpêk la,
I felnain buoina tinrêng
A’nthok nangin mi san suok rawh.
12 I hmangaina chuoi ngai lo chun,
Ka hmêlmahai vaw dei vong la,
Mi dotuhai sukchimit rawh,
Nangma siehlaw ka ni si a.