Vĕng him hnǐna
Davida inpakna hla.
140
1 Mi suol lak a’nthok LALPA,Nangin mi hung san suok la,
Mi nun rawnghai laka chun,
Nangin mi hung humhim rawh.
2 An lungrilin ieng lai khom,
Thil suol thaw an tum zing a,
Ni tin buoina an chok suok.
3 An lei rûl lei ang a ngei,
An hmŭr rûl tûrin a sip.
4 Mi suol lak a’nthok LALPA,
Nangman vêngin mi hum la,
Mi sukthlu tum nunrawnghai
Laka inthok mi hum rawh.
5 Chapohan mi âwk tumin,
A rûkin châng an kam a,
Ka khăn hrawah lĕn zarin,
Lampui tluonin châng an kam.
6 “Ka Pathien chu nang i nih”
Tiin LALPA ka hril a.
Aw LALPA, zangaina hni’n,
Ka ko che, mi ngaithla rawh.
7 Aw ka Lal le ka Pathien,
Sandamtu hrat le ka phaw,
Doral laka mi humtu-
8 Mi suolhai duthusam chu,
Inhlawtling tir naw LALPA;
An tum i’n hlawtlingtir chun,
Chapo pal hlauh rawi an tih.
9 Mi’n huoltuhai lu chungah,
An mi vauna chu tla sien;
10 An chungah meiling sûrin,
Khuorkhurûmah tla sien la,
Hung suok nawk ta naw raw se.
11 Mi sietna hriltuhai chu,
Hnuoia hin hlawtling naw sien,
Nunrawnghai chu sietnain,
Hnotin nang chîng tawl raw se.
12 Mi retheihai chu LALPAN,
A tran rop hlak ti ka hriet,
Pasiehai ta dingin ro,
Indik takin a rĕl hlak.
13 Mi indikhai chun lawmin,
I hming inpâk ngĕi an ta,
Mi nun ngîlhai i bulah,
Chêngin khawsa hlak an tih.