Iengkim hretu Pathien
Davida inpakna hla
139
1 Aw LALPA, nang chun ngun takaMi dap suokin i mi hriet vong.
2 Ka thrung ka ngǐrhai i hriet a,
Răl hla taka inthok khomin,
Ka ngaituohai i hmu tlang vong.
3 Ka fĕna le ka chawlna hai,
Nangin iengkim i hmu vong a,
Ka um dan po po i hriet chieng.
4 Ka hril hma khomin aw LALPA,
Ka hril ding po po i hriet vong.
5 Ka hma thruoia ka hnung dâlin,
I kutin i mi hum tlat hlak.
6 I mi hriet chîk dan makzie hi,
Ka ta di’n sui suok ruol an nawh.
7 I Thlarau kuoma inthokin,
Khaw lai am fe hmang thei ka ta?
I hmu phăk loah khaw lai am,
Tlân hmang thei hrim hrim ka ta le?
8 Vănah lawn lang, nang i um a,
Seolah zălna zu rem lang,
Chu taka khom chun i um si.
9 Zîng thla putin inlêng lang khom,
Tuipui kilah hmun khuor lang khom,
10 I kutin mi lo thruoi i ta,
I chang tieng chun mi chel i tih.
11 “Inthimin mi thup tlat a ta,
Ka vêla varhai chu zănin,
Inchang a tih” ti ding ni lang,
12 Thim chu i ta di’n thim an nawh,
Zăn hi sŭn angin a var a,
Thim le var hi i ta dingin,
Thil thuhmun char an ni si a.
13 Ka taksa bung tin i siem a,
Ka nu sŭlah i mi rem khawm.
14 Mak tak le râpum taka siem,
Ka ni leiin lawmthu ka hril,
I thilthaw makzie ka hriet chieng.
15 Arûka siem ka ni lai a,
Hnuoi rila i mi rem khawm lai,
Ka rurĕl iengkim i lakah,
Thup hrim hrim a um dĕr naw kha.
16 Ka ruongâm la kim lohai chu,
I mitin i hmu fai vong a,
Ka nihai a’n tran hma daiin,
Ka dam sung hun dinga ruot chu
I lekhabuah a chuong vong.
17 Aw Pathien, i ngaituona chu,
Ka ta dingin a va hlu de!
A rêng lem chun, a ropuiin,
A va hang nasa awm de aw!
18 Tiem ding ni lang, a tam tieng chu
Phaiphin nèkin tam daih a tih.
Tiem zo ding chun, i dam kum zat,
Kei khom ka dam ve ngai a tih.a
19 Mi rilohai hi aw Pathien,
Sukbohmang tawl la ka ti de!
Nangni thisen insuo hmanghai,
Hla takah mi zămsan dai ro.
20 Suol takin an hril siet che a,
Dotuhan i hming an hmang suol.
21 A theidatu che chu LALPA,
Ka theida ve naw am a ni?
I chunga helhai chu LALPA,
Ka tirdak tawl naw am a ni?
22 Theida takte’n ka theida a,
Hmêlmaah ka ruot tawl a nih.
23 Aw Pathien, mi dap fâi kĕl la,
Ka lungril hi hre tlang vong rawh.
Ka ngaituona po po fie la,
Nangin iengkim hre fâi vong rawh.
24 Keimaa hin rîtlona hrim,
A um le um naw en chieng la,
Chatuon lampuiah mi thruoi rawh.