Lawmthu hrilna
Davida ta
138
1 Ka lungril po poin LALPA,Lawmthu ka hung hril chê a nih.
Hnam dang pathienhai hmaa khom,
Nangma inpâkin hla ka sak.
2 I Tempul thienghlim tieng nghain,
Hung chawibiek rop ka ti che a,
I zangaina le ringumna
Leiin i hming inpâk ka tih,
Iengkim chungah i thu le hming,
Nangin i chawi sang ta si a.
3 Ka ko chein, i mi don a,
Mi sukhuoiin i mi sukhrăt.
4 Hnuoi lalhai po poin LALPA,
Nangma chu inpâk an ti che,
I bău suok an hriet ta leiin.
5 LALPAN thil a thaw danhai chu,
Inpâkin zai rem raw hai se,
LALPA chu a ropui si a.
6 LALPA chu chunghnung hle sien khom,
Mi hnuoihnunghai a ngaisak a,
Mi chapo ruok chu a’n chik vong,
Răl hla taka inthok khomin.
7 Buoina kâra ka’n lèng lai khom,
Ka hringnun i humhim hlak a,
Hmêlma lungsen hung inthok chu,
I kut pharin i vai kieng a,
I kut chang tiengin i mi san.
8 LALPA, i ngilnei kumkhuo a,
I kut sinthawhai hi LALPA,
Tawpsan loin sunzom pei rawh.
Ka ta dinga LALPA ruot chu,
Amain hung hlen suok a tih.