LALPA tritu hlimnaa
112
1 Haleluia!LALPA trìtu chu a hamthra,
A thupêkhai lawm hlak mi chu.
2 A thlahai chu hi hnuoia hin,
Mi ropui tak hung ni’ng an ta,
Mi nun ngîl thlahai hrim hrim chun,
Malsawmna hung dong pei an tih.
3 An sungkuo chu neinung an ta,
A felnan chatuon a dai si.
4 Mi nun ngil ta din thima khom,
Khaw var mawi a hung suok hlak a,
Mi tlâi, ngilnei le indik ta di’n.
5 Phal taka inpuktir hlaktu,
Indik taka hringnun khaltu
Ta di’n thil thra hung tlung a tih.
6 Mi indik chu a’n hnǐng ngai nawh,
Kumkhawtluongin hriet hlawng a tih.
7 Thu se dong a’n lău ngai naw a,
A lungril a zâm ngai bok nawh,
LALPA-ah a’n suknghet leiin.
8 A lungril a det indo a,
Zămna hrim hrim nei ngai naw nih;
A tawpah a hmêlmahai chu,
Intlawmin hnuoisie vong a tih.
9 A thilpêkhai a sem dar a,
Pasiehai kuomah a pêk a,
A felna chun chatuon a dai,
A lu chawi sangin um a tih.
10 Mi riloin a hang hmu chun,
A lung chu khei ĕm êm a ta,
A hä râwtin bohmang a ta;
Mi rilohai beiseina chu,
Ieng khom loin a thamral hlak.