Pathien hmangaina
Davida ta.
103
1 Aw ka thlä, LALPA inpâk la,Ka sunga umhai po poin,
A hming thienghlim inpâk raw se.
2 Aw ka thlä, LALPA inpâk la,
Hamthratna a mi pekhai hi,
Theinghil pal ngai hrim hrim naw rawh.
3 I suol po po a ngaidam a,
I natna tinrêng a sukdam.
4 Khura inthoka la suokin,
Lunginsietna inkhumtirin,
5 Thil thra tinrênga chawm tlaiin,
Mupuia angin i tleirawlna,
A tuoi tharpek nawk che a nih.
6 Thilthawah LALPA a’n dik a,
Nêksawrna tuortuhai ta din,
Indik takin ro a rêl hlak.
7 A ditzawng Mosie a hril a,
Israel mihai kuoma chun,
A thilthawtheizie a’n entir.
8 LALPA chu ngilnei le hmêl tlâi,
A lung khom sen mei mei ngai lo,
Hmangaina chuoi ngai lo a nih.
9 Mi a kawk mei mei ngai naw a,
A lungsen a pâi zing ngai nawh.
10 Ei suol anga mi thung loin,
Ei bawsietna ang phŭ khomin,
A mi thungrul ve ngai bok nawh.
11 Hnuoi nĕka van a’n săng ang hin,
Ama trituhai chunga chun,
A lungsietna chu a’n sang a.
12 Sak le thlang an inhlat ang hin,
Ei bawsietnahai hla takah,
A mi sie hmangpek dai a nih.
13 Pain nau a lungsiet angin,
Ama trituhai chunga chun,
LALPAN lunginsietna a hauh.
14 A mi siem dan a hriet chieng a,
Pilvut el ei nih ti a hriet.
15 Mihriem hi hlobet ang a na,
Ram hlo angin a hung pâr a;
16 Thli hung hrangin a lên hmang a,
Tu hriet khom a hlaw ta ngai nawh.
17 Ama trituhai chunga chun,
LALPA a ngilnei kumkhuo a,
A felna khom an tu suon chen,
A danglam nawh, a pangngai zing,
18 A thuthlung vong zingtuhai le
A thupêk zawmtuhai ta di’n.
19 Văn sânga khin a lalthrungpha,
LALPA chun a hang innghat a,
Iengkim chungah ro a rêl ie.
20 Nangni a vantirko hrathai,
A thu le ditzawng zawmtuhai,,
LALPA chawimawiin inpâk ro.
21 A rongbawltu văn mipuihai,
A ditzawng thil thaw hlaktuhai,
LALPA inpâkin chawimawi ro.
22 A thu hnuoia um po po le
A kutsuok thilsiem tinrêngin,
LALPA inpâkin chawimawi ro.
Aw ka thlä, LALPA inpak rawh.