Tuoi thar hnǐna trongtrai
Sukdŭdăna tuora chău
tlangvalin a nuor thusim
an samna a nih.
102
1 LALPA, ka trongtrai ngaithla la,Ka hnǐna hin i kuom tlung sien;
2 Beidong taka ka um lai hin,
Ka lakah i hmêl thup naw rawh.
Keima tieng i nä hung daw la,
Ka koin mi hung don nghal rawh.
3 Ka dam sŭng nihai hi damten,
Meikhu ang an inzăm ral a,
Thuka thingthu hring kăng angin,
Ka rù le chânghai an inŭt.
4 Hlobet sir hmât vuoi hnung angin,
Ka lung a koi inhmât vong a,
Fak le dawn ka zong pei ta nawh.
5 Ka beidong inrŭmna leiin,
A rù khât chauh ka lo ni tah.
6 Thlalĕr tuivalonga ang ka na,
Khaw ram simbuk ang el ka nih.
7 In chung sîpa chongzong fu fâl,
Angin ka ngha vêl lep lep a.
8 Hmêlman ni tin mi dêusawin,
Ka hming inriem khumnan an hmang.
9 Bu-a ka ring chu vut a na,
Ka dawn khom mitthli pol a nih.
10 I lungsen so insang leiin,
Pot dokin sîrah i mi hnăwl.
11 Ka hringnun hi zàn tieng hlim thla,
Ral nawk el hlak ang hi a na,
Hlo hnâ angin ka vuoi zo tah.
12 Nang chu LALPA, chatuon chenin,
Lalthrungphaah in thrung leiin,
Ruolthar hung pei dinghai lai khom,
I hming rè ngai hrim hrim naw nih.
13 Thoin Zion lunginsiet la,
Ditsak hun a ni takzet a,
Hun bituk khom a tlung ta hi.
14 I siehlawhan a lung bang chen,
An ngainain an lungdum a;
A pilvut chen an lunginsiet.
15 Hnamhan LALPA hming tri sien la,
Hnuoia lalhai po po khomin,
A ropuina chu tri raw se.
16 LALPAN Zion tungding a ta,
Ropuina leh inlang a tih.
17 Vâkvăihai trongtraina LALPAN,
Donin ngaisakpek tâng a ta,
An thil hnì lo hmusit naw nih.
18 Thrang la hung thar peihai ta di’n,
Hieng thuhai hi inchik thra rawh,
Suon la hung pieng pei dinghaiin,
LALPA an inpàk theina din.
19 A hmun insang van a’nthokin
LALPAN hnuoi a zuk thlìr hlak a,
20 Tânghai inrŭm ri ngaithlain,
Thi dinga ruothai a san suok.
21 Chuongchun mihan LALPA hming chu,
Zionah hril dar tang an ta,
Jerusalem khawzawla chun,
A hming hung chawimawi bok an ta,
22 Ram tina mi hung pung khawmin,
LALPA chu hung chawibiek an tih.
23 Ka vanglai thà sukkulchoin,
Ka nihai khom a suktawi a.
24 Chuongchun, hieng ang hin ka ti a:
Aw ka Pathien, ka vanglai hin,
Mi la hmang el naw hrâm raw khai;
I kum chun thrang tin a dai si.
25 A tirin hnuoi thrut i phŭm a,
Vănhai khom i kutsuok an nih.
26 Sienkhom la thamral vong an ta,
Nang ruok chu um kumkhuong i ta;
Puon angin la chul vong an ta,
Silfen angin la hnawl i ta,
An rêngin la bohmang an tih.
27 Nang ruok chu i pangngai zing a,
I kumin kin ni nei naw nih.
28 Kan thlăhai chu i ângsûngah,
Him takin chêng muong ta’ng an ta,
An suonhai khom i angsungah,
Siem nghetin hung um pei an tih.