Laltak thutiem
Davida inpâkna hla
101
1 I hmangaina le indikna,Inpâkin zâi hla sak ka ta,
LALPA, zâiin inpâk ka che.
2 Soisel boa nung thei dingin,
Fimkhur takin kal chawi ka tih.
Iengtik am mi hung kan i ta?
Dem kai lo lungril chu putin,
Ka insungah khawsang ka ta;
3 Thil thra naw tieng pangah hrim hrim,
Ka mit inlĕn ngai naw ningah.
Ringduophai thilthaw hrim hrim chu,
Ka theida zawng tak a ni a,
An min koppui ka phal bok nawh.
4 Mi lungril kawihai hrim hrimin,
An mi hung hnaih ka nuom naw a,
Thil suol leh inkop thei naw ning.
5 A rûka vênghai dem chîng chu,
An băuhai khârpêk hmak ka ta;
Mengsâng le lungril chapohai,
Ka ngai thei zawng mi an ni nawh.
6 Ram sûnga mi ringumhai chu,
Ditsak takin cheibăwl ka ta,
Ka kuomah inchengtir ka ta,
Soisel boa kalchawihai chu,
Ka rongbawltuin hmang ka tih.
7 Tu khom mi hlĕm hmang hrim hrim chu,
Ka insŭngah chêng naw ni hai;
Tu khom khêl hril hmang hrim hrim chu,
Ka bula um phal bok naw ning.
8 A ram sûnga mi suolhai chu,
Tûk tinin hmet dei tawl ka ta,
LALPA khawpuia inthokin,
Suol thaw chìnghai hnot suok ka tih.