Humhimtu Pathien
91
1 Chunghnungtak thla hnuoia khawsa,Iengkimthawthei bula chêngtu’n,
2 “Ama chu ka’n bǐkna kulpui,
Ka ring Pathien ngei chu a nih”
Tiin LALPA thu puong ka tih.
3 Châng a’nthokin san suok a che,
Hripui tri-um lak a’nthokin.
4 I chung zawnah thla zâr a ta,
A thla hnuoiah inbǐng i ta,
A ringumna chu i phaw le
I kul dài lo ni ta’ng a tih.
5 Zan thim râpum tri nawng i tih,
Sŭna thal inlêng vêlhai khom;
6 Zăna vĕtu che hrilênghai,
Sŭna hripui inlêng lakah,
Sietna ieng khom tri naw ti nih.
7 I voi tieng a sang têl tluin,
I chang tieng sing têl tlu sien khom,
Tâwk ve naw hrim hrim a ti che.
8 Mi rilohai a hrem dan chu,
I mit ngeiin la thlîr i tih.
9 Chunghnungtak rûnpuiah chêng a,
Ka bĕl LALPA i bĕl ve chun,
10 Thil thra loin nang nawng a che,
Sietnan tlakbuok bok naw ni che.
11 Vantirkohai thu pêng a ta,
I lam tinah vêng an ti che;
12 Kutin chawi kâng an ti che a,
Lungah i ke sui naw ti nih.
13 Sakeibaknei le rûlriel hai,
I kein la sir dêng i ta,
Sakeibaknei vanglai ngei chu,
Rûlpui leh la sir dèng i tih.
14 LALPA chun hieng ang hin a tih:
“Aman a mi hmangai leiin,
Ama chu san suok ngei ka ta,
Ka hming a pom tlat hlak leiin,
Ama chu humhal tlat ka tih.
15 Mi ko a ta, lo don ka ta,
Harsatnaah umpui ka ta,
San suok ka ta, chawimawi ka tih.
16 Dam sawtnan suklungawi ka ta,
Ka sandamna chu hmu’ng a tih.”