BU LINA
(90-106)
Pathien le mihriem
Pathien mi Mosie trongtraina
90
1 LALPA, nang chu suon po poa,Kan chèng himna in chu i nih.
2 Tlânghai i hung indin suok hma,
Hnuoi le khawvel i siem hma daih,
Chatuon a’nthok chatuon chenin,
Nang chu kan Pathien i ni si.
3 “Kir ro, hriem nauhai” i ti pha,
Pilvutah kan kir nawk diel hlak.
4 I ngaia chun kum sangkhat khom,
Zani liem tah ang chauh a na,
Zan vĕng khat ang chauh a ni si.
5 Tui lien angin i lĕn hmang a,
Thrang khat insìm ang chauh a na,
Zîngkâra hlo mawng ang a nih;
6 A’n thrang lien a, a hung pàr a,
Zan tieng vuoiin a rêm nawk hlak.
7 I lungsenin a mi hlieu a,
I lung chokin a mi thlabàr.
8 Kan bawsiethai i hmu vong a,
Kan suol thaw rŭkhai chen khomin.
9 I lunginsenna hnuoia chun,
Kan ni tin nun hi a liem a,
Beidong inthuok bong hak ang hin,
Dam lai ni hi kan suktawp hlak.a
10 Kan dam chen hun kum sawmsarih,
Hrisel leiin kum sawmriet khom;
Dam sawt chu rimsik tuor sawtna,
Lungngai sawtna chauh a ni si.
Inrang takin a liem hmang a,
Kan vuong hmang nawk diel hlak a nih.
11 I lungsen natzie hre phâk a,
I trium anga tri nachang,
Hre phâk hrim tu am an um a?
12 Kan dam lai nihai tiem dan dik,b
Nangman mi hung inchuktir rawh,
Lung var kan nei phăna dingin.
13 Aw LALPA, hung ngha kǐr ta rawh.
Ieng chen am i mi tosan ding?
I siehlaw hi lunginsiet rawh.
14 I hmangaina chuoi ngai lo chun,
Zîngkâr hin mi hung hrâi tlai rawh,
Kan ni tinhai chu hlim taka,
Kan intăwi liem theina dingin.
15 Rinumna le thil thra nawhai,
I mi’n tuortir hun chen hû bèk,
Hlimnain mi’n chènchîltir rawh.
16 I siehlawhai mithmua ngei,
I thilthawhai inentir la,
An suon le parhai kuoma khom,
I ropuizie hi puong lang rawh.
17 LALPA Pathien ditsakna chu,
Kan chungah vŭrin um sien la,
Kan kut sinthaw hung suknghetin,
Kan kut hi mal hung sawm raw se.