Hnam buoi lai thu
Ezrahit mi Heman hla var
89
1 LALPA hmangaina ropui chu,Kumkhawtluongin inpâk ka ta,
Suon po po lai i ringumzie,
Ka bâu ngeiin puong dar ka tih.
2 I hmangainan kumtluong a dai,
I ringumna văn ang a nghet.
3 “Ka mi thlang kuomah thu ka thlung,
Ka siehlaw Davida kuomah:
4 ‘I thlahai lal ni pei an ta,
An suonhai khom inlal peiin,
Lalna hluo pei an tih’ tiin”.
5 Vănvêlhai lai khin aw LALPA,
I ropuina an inpăk a,
Mi thienghlimhai pungkhawmnaah,
I ringumzie an inpăk hlak.
6 Thangvănah nangma tluk LALPA,
Tu dang hrim am an um thei a?
Văn mihai lai khin nangma tluk,
Tu dang hrim am an um thei ding?
7 Văn mi thienghlim thrungkhawmhai lai,
Pathien hi tri a um tak a,
Ama kîl vêltu po po lai,
LALPA a mak râpum tak bok.
8 LALPA Iengkim Pathien ang hi,
Mi tu dang am an um hrim a?
LALPA, nang chu i ropui a,
I ringumnan a’n huol vĕl che.
9 Tuipui hrâng buon buon chunga khom,
Nang chu rorêltu i ni a,
Tui fawn sang khom i hal rè hlak.
10 Mithi ruong zâl ang top elin,
Nangin Rahaba i sir sop a,
I bân tha hrătin hmêlmahai,
I vai dar chum chum tawl si a.
11 Vănhai i ta, hnuoi khom i ta,
Khawvel le a sunga umhai,
Nangma siem vong an ni si a.
12 Sim le hmar khom i siem an na,
Tabor le Harmon tlang khomin,
Nangma chawimawina hla an sak.
13 I bân thä a hrât ĕm êm a,
I voi tieng thă a hrât hle a,
I chang tieng thä a hrât nawkzuol.
14 Indikna le rorêlna fel,
I lalthrungpha lungphŭm an na;
Hmangaina le ringumna chu,
I hmatâwnga i hmang an nih.
15 LALPA, nangma chawimawi nachang,
Hretuhai chu an ham a thra,
I hmêl ênga lêng hlaktu chu.
16 I hming lawmin an hlim ni tin,
I felna chungah an lawm hlak.
17 An ropuina-hrătna i na,
I ditsakna an dong leiin,
Kan ki khom a mawi a ni hi!
18 Kan phaw hi LALPA ta a na,
Kan lal khom Israel Mi Thienghlim
Tâ ngei el chu a lo ni si.
Davida kuoma Pathien thutiem
19 I mi ringumhai chu zĕlin,
Kha hma khan thu i lo hril a:
“Pasalthra, hratnan ka’n thuom a,
Nêlvai laia ka thlang suok bik,
Tlangval chu ka chawi sang tah a.
20 Ka siehlaw David ka hmu suok,
Ka hriek thienghlim chu ka năl a;
21 Ka hratna’n inthuom zing ka ta,
Ka kutin sukhrât zing ka tih.
22 Hmêlma hnuoiah kûn naw ni a,
Mi suolhan neksâwr bok naw nih.
23 A hmêlmahai hnèpêk ka ta,
A hmaah vaw thlu tawl ka tih.
24 Ka ngilneina le ringumna,
A kuoma chun um zing a ta,
Ka hming leiin a kî khom chu,
Chawi sangin la um pei a tih.
25 Tuipui chungah thû nei a ta,
Vadungpui chen inlal a tih.b
26 Ama chun, ‘Ka Pa, ka Pathien,
Ka Lungpui le ka Sandamtu
I nih’ tiin mi ko a tih.
27 Ka nau lutìrah siem ka ta,
Hnuoia lal po pohai lai hin,
Chawimawi hlaw tak la ni’ng a tih.
28 Ama chu hmangai zing ka ta,
Ka thuthlung hi inkhêl naw nih.
29 A thlăhai inlal pei an ta,
Vănvêl um sung chun a ramin,
Kin ni hrim hrim nei ngai naw nih.
30 “A nauhan ka danhai hnâwl a,
Ka thuhai an zawm tawl naw a,
31 Ka thupêkhai chu ngainêp a,
Ka dàn pèkhai an zawm naw chun,
32 An suolna leiin hrem ka ta,
An bawsietnahai chunga chun,
Vuokna hmolin hlap tawl ka tih.
33 Sienkhom ka hmangaina ruok chu,
La kîr nawk ta ngai nawng ka ta,
Ka ringumna hnûk kǐr naw ning.
34 Ka thuthlung sût ngai nawng ka ta,
Ka bău suok inphat ngai naw ning.
35 ‘Davida hlĕm ngai naw ningah’
Tiin ka hming thienghlim sâlin,
A tawp chen dingin ka’n tiem a:
36 A thlahai mang ngai naw ni hai,
A lalna nisa ang tloin,
Ka hmaa hin nghet zing a tih.
37 Chung sorthla khi a um sung chun,
A ram a kin ngai naw dingzie,
Hrepuitu dik ni zing a tih.”
Lal tlawm poitina
38 Sienkhom, i hriek nâl chu hnăwlin,
A chungah i lung a sen a.
39 I siehlaw kuoma i thuthlung,
Sûtin a lallukhum khum chu,
Hnuoiah i pei hawnpêk si a.
40 A kul banghai thriek darpekin,
A kulbǐnghai i sukchim vong.
41 A hung taphotin an rok a,
An sevêl ramhai nuizatbŭr,
A lo inchang el ta si hi.
42 Dotuhai kut i sukhrat a,
Hmêlma lawmsà an inchang tah.
43 A kawlhnâm i sukmawlpĕk a,
Indonaah i san ta nawh.
44 A ropuina chu lapekin,
A lalthrungpha khom chu hnuoiah,
Nangin i pei thalpêk dĕr a.
45 A tlangval sŭng khom kei tawiin,
Inzakna puon i’n siltir si.
Sansuok ngĕnna
46 Ieng chen rau am ie aw LALPA,
I hmêl i mi thuppek ding chu?
I lungsen hi meichok angin,
Ieng chen am a’n hlap ding a na?
47 Ka nun tawizie mi dawnpêk rawh.
Tep lo mei meia mihriemhai,
I mi hang siem el hi chu aw!
48 Mihriem pieng tah a tu hrim am,
Thi lo ding an um ta hlak a?
Tu am Seol pumpel thei ding?
49 LALPA, i hmangaina hmasak,
David kuoma ringum ding a,
I’n tiemna kha iem an ta le?
50 I siehlaw an nuisaw dan hi,
Hung theinghil lul naw rawh LALPA,
Hnam danghai endong le hmusit,
Ka tuor inrim dan po po khom.
51 I hriek nâl hi hmêlmahaiin,
A fĕna photah aw LALPA,
Hmusitin an cheksol a nih.
52 LALPA kuomah kumkhawtluongin,
Inpakna chu um zing raw se.
Amen, Amen.