Thrangpui hnia kona
Kora pawlhai inpakna hla.
Ezrahit mi Heman hla var. Lâm
puma inson peia sak ding
88
1 Mi sandamtu LALPA Pathien,Sŭn-zănin nang ka ko che hi,
2 Ka trongtraina i kuom tlung sien,
Ka hnǐna lo ngaithla hrăm rawh.
3 Ka thlä hi buoinan a chǐm a,
Thlăn koa ngîr ang kan ta hi.
4 Thlăn khura liem dinghai lai a,
Tiem sa ka lo ni ta hiel a,
Thä hlekte khom ka nei ta nawh.
5 Mithi laia an maksan tah,
Thlăna zâl ruonghai ang ka nih.
Chuonghai chu i hriet ta naw a,
I lakah sàt thlâk an ni tah.
6 Thlan mong dăpah i mi sie a,
Hmun inthim sa tawpkhawka chun.
7 I lungsennan mi del dein,
A sosâng chun a mi chǐm vel.
8 Ka ruol thrahai i mi làkpèk,
Anni pangzat mi’n hlawtirin,
Che thei loin i mi khuokhir.
9 Lungngaiin ka mit a’n vâi a,
Nangma tieng ka kut hung pharin,
Ni tin ka ko che aw LALPA.
10 Mithihai ta dingin thil mak,
I thawpèk hlak rĕng am a ni?
Mithi tahnung hung tho nawkin,
An inpăk ché i ringa maw?
11 Thlănah i hmangaina hrilin,
Sietna khurah i ringumna,
Puongin a um rêng rĕng hlak maw?
12 I thilmak thawhai hmun thimah,
Hmu thei a ni hlak am a ni?
Hriet zing hlaw ta lohai ramah,
I’n dikzie an hriet phak ding maw?
13 LALPA kei chun ka ko che hi,
Tûk tin ka hnǐna a hung tlung.
14 Ieng dinga kei mi pei thla a,
LALPA i hmêl i thup a na?
15 Ka tleirawl a’nthok tuor tranin,
Ka thi vàng váng châng a tam a;
I tribaiumnan mi manin,
Beidong takin ka um hlak kha.
16 I lungsennan a mi nuoi a,
Ka trǐna che’n ka chău se tah.
17 Tui angin an mi chǐm ni tin,
Ka vêlin an min huol khum hlak.
18 Ka ruol bul le ka lainahai,
I mi lak hmangpek dai si a,
Thim hi ka ruol nei sun an tah.