Hnam hmŭingǐlna ding hnǐna
Kora pawlhai inpakna hla.
85
1 Aw LALPA i ditsakna chu,I ramah hung inlangtirin,
Jakob i sukhmuingil nawk tah.
2 I mihai suolna ngaidamin,
An suolhai chu i’n khum hmang a.
3 I lungsen chu i’n kei dei a,
I lungpuomna i lakkir tah.
4 Mi Sandamtu aw kan Pathien,
Nangin mi hung tungding nawk la,
Kan chunga i lung ni nawna,
Mi hung la hmangpek hrăm rawh khai!
5 Kan chunga chauh lungsen loin,
Suon hung pei dinghai chunga khom,
I lungsen a rè naw ding maw?
6 I mihai hi nangmaa chauh,
Kan hung hlim nawk theina dingin,
I mi chokhar nawk naw ding maw?
7 I hmangaina chuoi ngai lo chu,
Kan chungah inlangtir nawkin,
Mi hung sandam rawh, aw LALPA.
8 LALPA Pathien hril ka ngaithlak:
A mihai le mi thienghlimhai,
Ama ringa pantuhai chu,
An invĕt nawk a’n ngot naw chun,
Inremna thuthlung a tiem a;a
9 Ei rama hin a ropuina,
A hung chêng zing theina dingin,
A trituhai chu ieng lai khom,
Sandam dingin a’n pei zing hlak.
10 Hmangaina le ringumna hai
Hung luong khawm diel diel ta’ng an ta;
Indikna le inremna hai
Inkuoin infawp ton an tih.
11 A ram leilungah ringumna,
A tharin indawn suok a ta,
Indikna chu van a’nthokin,
Hung inzàm thla ngei bok a tih.
12 LALPAN thil thra’n mi vûr a ta,
Ei ram tharsuok hnienghnâr a tih.
13 Indikna chun hma thruoi a ta,
A lampui ding buotsai a tih.