Pathien in ngaina
Kora pawlhai inpakna hla.
“Grep sawr khur” thlûka sak ding.
84
1 Iengkim LALPA, i chengna chu,A va hang mawi ngei de aw!
2 LALPA, i tuolzawl chu ngaiin,
Ka thlä an uoi ngàwi ngáwi a,
Ka taksa le lungril hi,
Pathien hring ngaiin a’n rŭm.
3 Aw Iengkim LALPA,
Ka Laltak le ka Pathien,
I maichăm bul vĕla chun,
A tuihai op kêuna di’n,
Chongzong hmanin bu neiin,
Peleu khomin bu a sep.
4 I in luma chênghai chu,
An va hamthra lawm lawm de!
An inpàk tawp ngai naw che.
5 I hràtna dongtuhai le
Lungrila Zion pan a,
Biekzintu chu an hamthra!
6 Bakaa ruom hraw hai sien khom,
Tuihnăr hmun a’n changtir a,
Favang ruo a’n tling puou hlak.
7 An kalchawi a zâng tul tul,
An rêngin Pathien hmaa,
Ziona an inlang chen.
8 Aw Iengkim LALPA,
Ka hnǐna hi ngaithla la,
Jakob Pathien, ka hnǐna
Mi lo ngaithlapêk hrăm rawh.
9 Kan phaw Pathien, mi en ta,
I hriek năl hi ditsak rawh.
10 I tuola ni khat chĕng chu,
Hmun danga ni sangkhat chĕng
Nêk daiin a thra lem a;
Mi suol ina chĕng nêkin,
Pathien ina kot vêngtu,
Nì chu kei ka thlang lem ie.
11 LALPA chu ka nî le phâw,
Ditsakna le chawimawina,
Mi vûr hlaktu chu a nih.
Lam indik hrawtu ta di’n,
LALPAN inro a nei nawh.
12 Aw nang Iengkim LALPA-a,
Innghattu chu a hamthra.