Hnam tungding dinga hnina
Asaf inpakna hla.
‘Lili par’ thlûka ursun taka sak ding.
80
1 Aw, Israel vêngtu Berampu,Ran anga Josefa thruoitu,
I nä mi lo dawpêk hrăm rawh.
Nang Cherubhai kăra inthrung,
I hmêl êng hung inlangtir la,
2 Efraim hai le Benjamin hai,
Manase hai chunga ngei hin,
I hràtna chu hung chokthoin,
Hungin keini mi san suok rawh.
3 Aw Pathien, mi tungding nawk la,
Sandama kan um theina din,
I hmêl êng mawi mi’n hmutir rawh.
4 Aw kan LALPA, Iengkim Pathien,
Ieng chen am i mihai hnǐna,
I lung insensan ding a na?
5 Bu-ah mitthli i’n ringtir a,
Nopuiin mitthli i’n dawntir.
6 Tuolbawmha’n an mi chèksol a,
Hmêlmahai nuisaw ka’n chang tah.
7 Iengkim Pathien, mi tungdingin,
Sandama kan um theina din,
I hmêl êng mawi mi’n hmutir rawh,
8 Aigupta rama inthokin,
Grêp hruia bul chu i phawi dok a,
Hnam dang umhai chu hnot suokin,
Anni hmuna chun i phun a;
9 A bul vêl chu i’n thiel fai a,
Nghet takin zung a hung thlàk a,
A ram phêkin a’n zâr duoi a.
10 Tlânghai chu a zăr hliep dup a,
Sidar lien tak takhai lerah,
A kâuhai a’n zăm kûr luoi a.
11 Thlang tuipuib chen inzâm tlungin,
Sak vadungpuic a’n zăm kai a.
12 Ieng leia a huon dai thriek a,
Mi inlonhai lo thei dinga,
Grêp chu i siem el am a na?
13 Sanghal ruolin an phir tan a,
Thilhring tinrêngin an fak siet.
14 Iengkim LALPA, hung ngha kir la,
Van a’nthokin mi zuk en la,
I grêp kung hi hung ngaisak rawh.
15 I kut ngeia, i ta dinga
I phun le suknghet kha a nih.
16 I grêp hruihai chu sât bongin,
Meiah peiin an raw ta hi;
I hmêl inthim inhmutirin,
Anni chu hung hal hlum tawl rawh.
17 I chang tienga mihriem naupa,
I ta ding lieua i sukhrat
Chungah i kut hung innghat rawh.
18 Chuongchun nghatsan ta nawng kan che,
Nangin mi hung sukhar tawl la,
I hming kan hung lam ding annawm.
19 Aw kan LALPA, Iengkim Pathien,
Mi hung tungding tawl nawk hrăm la,
Sandama kan um theina din,
I hmêl êng mawi mi’n hmutir rawh.