Jerusalem siet sunna
Asaf hla
79
1 Aw Pathien, i rochung ram hi,Hnam danghaiin an hung rŭn a,
I Tempul thienghlim sukporche’n,
Jerusalem an sukchim vong.
2 Chunglèng vatehai tlàn dingin,
I siehlawhai ruong an maksan;
I mi thienghlimhai ruong ngei khom,
Ramsahai tlàn di’n an maksan.
3 Jerusalem khawlaia chun,
An thisen tui ang a luong a,
Vuitu ding tu khom an um nawh.
4 Kan tuolbawmhai diriem hlawin,
Kan vĕla chenghai hmusit le
An nuizatbûr kan chang ta hi.
5 LALPA, i lunginsenna hi,
Ieng chen am a dai ding a na?
I lung a sen song di’m a ni?
6 Nangma hre lo hnamhai chungah,
I hming an lam nawna ramah,
I lungsenna bun thla lem rawh.
7 Jakob sunghai an that zo a,
An khuohai an sukram zo tah.
8 Kan pipuhai suolna maw chu,
Kan chungah intlâktir naw la,
I ngilneizie suklang vat rawh,
Kan chan a chău ta êm el hi.
9 I hming ropuina di’n, Pathien,
Mi thrangpui rawh, aw Sandamtu;
I hming leiin mi san suok la,
Kan suolnahai mi ngaidam rawh.
10 Iengti leia hnam danghaiin,
“An Pathien chu khaw lam a um?”
An mi ti vet el am a na?
I siehlawhai thisen phuba,
I lâk ngei ti hnam dang kuomah,
Kan hmu ngeiah inlangtir rawh.
11 Lung in intânghai inrûm ri,
I kuomah hung tlung ngei sien la,
Thi dinga an rêl tahai chu,
I bân tha hratin san suok rawh.
12 Aw LALPA, kan vêla chênghan,
An cheksolna che phuba chu,
A let sariin rŭl ngei rawh.
13 Chuongchun, keini i tahai hin,
I rama tla i beramhan,
Lawmthu hril kumkhuo tang kan ta,
Suon a’nthoka suon nawk peiin,
I’n pâkna thu puong pei kan tih.