Pathien le a mihai
Asaf hla var.
78
1 Ka mihai, ka thu ngaithlain,Ka trong bausuok hi ngaiven ro.
2 Tekhinthu hmangin hril ka ta,
Tienlai thu inthup puong ka tih-
3 Ei ngaithlak le hriet tahnunghai,
Pipuhan an mi hril hlak kha.
4 An nauhai kuomah ip loin,
Thrang la thar pei ding kuoma khom,
LALPA ropuizie le hratzie,
Thilmak a thaw hlakhai thu chu,
An hriet di’n hril sawng pei ei tiu.
5 A thu Jakob-ah suknghetin,
Israelhai Dàn a pêk a,
An thlahai hril sawng pei dingin,
Ei pipuhai thu a rosie:
6 Thrangtharhaiin chu chu hre a,
Thrang la pieng lohai chen khoma,
An nauhai an hril sawng pei din;
7 Pathienah beiseina nghat a,
Pathien thilthawhai nghil lo a,
A dan an zawm peina dingin;
8 An pipuhai anga lulul,
Hel hmang le lungril nghet lo tak,
Pathien laka ringum lo mi,
An hung ni ve nawna dingin.
9 Thal le thrang Efraim mihai chu,
Indonaa chun an tlàn sie;
10 Pathien thuthlung an zawm naw a,
A dàn angin an um nuom nawh.
11 A thilthawhai an theinghil a,
Thilmak a thawpèk hlakhai chu.
12 Aigupta ram Zoan phaiah,
An pipuhai mithmu ngĕiah,
Thilmak tam tak a thawpèk hlak.
13 Tuipui suktanin a thruoi kai,
Tui chu bang angin a’n ngirtir.
14 Sŭna po sûmin a thruoi a,
Zănah meichok varin a thruoi.
15 Thlalĕrah lungpui vaw koiin,
Tuipui anga tam tui a pêk.
16 Lungpui kaka tui hung suok chu,
Vadung angin a luong dum dum.
17 Chuong sa khom chun, thlalĕra khan,
Chunghnungtak lakah an hel si.
18 Pathien fie phêt tum lungrilin,
An chàkzawng fàk ding an ngèn a;
19 “Thlalĕrah Pathienin ruoipui,
Ieng tin am thrè teu hlak a ta!”
Tiin Pathien an deusaw a.
20 “Lungpuiah tui vaw suok sienkhom,
A mihai hi bei le sain,
A chawm thei rok ding maw?” an tih.
21 LALPAN a hriet, a lung an ling,
Jakob chungah mei an tlàktir,
Israel chungah a lungsen.
22 Pathien chu an ring zo naw a,
A san suok thei an ring bok nawh.
23 Sienkhom van khi thu a pêk a,
Van kotkharhai chu a hong a;
24 Fak ding mana a’n sùrtir a,
Van bu chun a chawm tawl tah a.
25 Vantirko bu chu an făk a,
Hnienghnâr takin a chawm tawl a.
26 Sak thli chu hung inhràngtirin,
Sim thli khom a hung tir bok a.
27 Pilvut angin sä an sùrtir,
Vakam trieu zât ang hiela tam,
Vate chu a hung pêk tawl a.
28 An bŭk tuolah an hung tla a,
An chèngna puon in vèla chun.
29 Dit tawka tlaiin an făk a,
An châk tak a pêk a ni si.
30 Sienkhom, sa an la rêt zing lai,
An bauah an la hmuom laiin,
31 An chungah Pathien a lungsen;
An mi hràthai a thatpek a,
Israel tlangval tam tak chu,
An lo bohmang zo tah a nih.
32 Chuong sà khom chun an suol lui pei,
A thilmak thaw an hmua chu,
Ama an ring nuom chuong si nawh.
33 Chuleiin, an dam sung nihai,
Thuok angin a suktawppèk a,
Thlabârin dam sung an hmang zo.
34 A that tawl pha, Pathien zongin,
Sima thrahnem hung ngai nawkin,
Ama tieng an ngha nuom chau a.
35 An himna Lungpui chu Pathien,
Chunghnungtak chu anni Tlantu,
A nizie an hriet suok nawk hlak.
36 Sienkhom, hmŭrin an inpăk der,
An leiin khêl an hril bok si.
37 An lungril chu a nghet naw a,
A thuthlungah an ringum nawh.
38 Chuong sà khom chun ngil a nei a,
An bawsietnahai ngaidamin,
Anni a sukbohmang nuom nawh.
A lungsen a’n sùm hràm hrám a,
A lungpuom a kei dei lem hlak.
39 Thli hrânga liem nawk el hlak,
Mihriem el an nih ti a hriet.
40 Thlalĕra khan an hel rop a,
Voi tam a lungril an sukna.
41 Pathien an fie an fie hlak a,
Israelhai Mithienghlim chu,
An chophăwk zìng zíng hlak a nih.
42 A thilthawtheizie an theinghil-
Hmêlma kuta a san suok dam,
43 Aiguptaa Zoan phaia,
Thilmak ropui tak a thaw dam;
44 An vadung tuihai thisena,
A’n chang leia tui dawn ding hrim,
Hre loa an um lai hai dam;
45 Tlip inlêngin se hrep tawl a,
Ram pumah utrok intâm a,
Thil nasa tak an suksiet dam;
46 Tuktulungin thlai inram a,
Khăuin bu an fak zo thu dam;
47 Rielin an grephai deng se a,
Zilin theichanghai hmet hlum a,
48 Rielin an bawng ruol dêng hlum a,
Trêkin ran ruol a deng hlum dam.
49 Sukramtu vantirko hmangin,
A lungsenna intûr ngul chu,
An chunga chun a bun thlak a.
50 A lungsen hrîkthlakna dingin,
Thǐna lakah hum tawl loin,
Hripui a’n lengtir tah a nih.
51 Aiguptaa nau lutir po,
Hama ina vanglai nauhai,
An rêngin a sukhlum vong a.
52 A mihai chu beram angin,
Thlalĕrah a thruoi suok vong a;
53 Muongleiah a thruoi tlung tawl a,
Tritna hrim hrim an hriet phak nawh;
An hmêlmahai ruok chu tuiin,
A chim pil tawl vong tah a nih.
54 A kut ngeia a làk tlangram,
Ram Thienghlim ramri bula chun,
Anni chu a hung thruoi tlung a.
55 Hnam danghai chu a hlù suok a,
Israelhai a’n hluotir a,
An chan ram ding a sempek a.
56 Sienkhom Pathien an fie nawk a,
Chunghnungtak lakah an hel a,
A dànhai khom an zawm nuom nawh.
57 An pi le puhai dungthŭlin,
Vervêk takin an nghatsan a,
Thal ngul kàwi anga káwi an nih.
58 Hmunsang siemin an chophăwk a,
A lung khei zawng milim an sie.
59 Pathienin chuong chu a hmuin,
Namên loin a lungsen a,
Israel a hnawl fithla a.
60 Mihriem laia a chĕngna hlak,
Siloa hmun thienghlim a rausan.
61 A hrătna le a ropuizie,
Inlangtirna Thuthlung Bawm chu,
Hmêlma kutah a’n mantir a.
62 A lungsen chun a rochanhai,
Kawlhnâmin a’n sàmtir tawl a,
63 Meiin tlangvalhai a lem zo,
Nunghakin pasal an invai.
64 Thiempuhai khom an săt hlum a,
An nuhmeihan an trà ngam nawh.
65 Mi hrât, zu rui thophang angin,
LALPA chu a hung tho suok a.
66 Hmêlmahai chu a tukdol a,
Kumkhuon a sukmuolpho tawl a.
67 Josefa thlahai a hnawl a,b
Efraim hnam khom a thlang bok nawh.
68 Juda hnam chu a thlang tah a,
A lungdum tak Zion tlang leh.
69 Van sânga a hmun thienghlim ang,
Chu chun a Tempul a bawl a
Kumkhaw dai dinga siem nghetin,
Hnuoi angin a suknghet tah a.
70 A beram veng lai la suokin
A siehlaw David a thlang a;
71 Beramte hruoi a enkol lai,
A rochan Israel hnamhai,
Jakob thlahai keitleitu di’n,
Ruotin a lo um tah a nih.
72 Ringum takin a enkol a,
Rem hre takin a kei thruoi a.