Beidong laia thlamuongna
Jeduthan ta ding.
Asaf Inpakna hla.
77
1 Rawl tawp suoin Pathien ka ko,Mi ngaithla din ka ko inring.
2 Ka beidong pha LALPA ka zong;
Bân kham ding khom dawn lêk loin,
Zankhawvarin ka phar suok a,
Sienkhom ka thlâ a muong thei nawh.
3 Pathien ngaituoin ka’n rùm a,
Chau hnêp khopin ka dawnkhawl hlak.
4 Ka’n sîm met khom i phal naw a,
Beidongin ka trong thei ta nawh.
5 Hun liem tahai ka dawn kìr a,
Kum sul tam liem ta hnunghai kha;
6 Zanah khŭn taka dap vêlin,
Lungrilin zawna ka’n don a:
7 “LALPA chun mi hnawl kumkhuoin,
A mi ditsak naw song ding maw?
8 Ami hmangaina rè songin,
A thutiem a’n khêltir ding maw?
9 Zangai nachâng theinghil songin,
Lungsen leiin a lainatna,
A kharkhip song el dim a ni?”
10 Chuongchun, hi hi ka ti hiel a:
“Chunghnungtak kut a châu el hi,
Kei ka beidongna tak a nih.”
11 Kei chun LALPA, i thilthawhai,
Tien a’nthoka i thilmak thaw,
Tinrênghai chu hre zing ka tih.
12 I thilthawhai dawnkhawl ka tih,
Thil ropui tak i thawhai chu,
Suiin ngaituo rop hlak ka tih.
13 Aw Pathien, i lampui a thra,a
Ei Pathien anga ropui hi,
Pathien dang hrim an um ngai nawh.
14 Thilmak thawtu Pathien i na,
I hratzie hnam tin i’n entir;
15 I bân tha hrâtin i’n tlan suok,
I mi, Jakob-Josef thlahai.
16 Aw Pathien, tuihai chen khomin,
An hmu chêin an thlabàr a,
Li inthukhai an inthin hàwp.
17 Sûmin ruo a’n surtir chur chur,
Khawk dur durin van a’n rûm a,
Kawl inlepin a’n phe zuk zuk.
18 Sûmpui inziel mup mup a’nthok,
Trêk a hung tla ri dur dur a,
Kawlphe’n khawvel a dêt suok a,
Hnuoi inthinin a’n sawi bup bup.
19 Tuipui chu i lampui a na,
Tui inthukhai i fe thleng hlak,
Sienkhom i hniek an hmu ngai nawh.
20 Mosie le Aron kut hmangin,
I mihai chu ran ruol angin,
I thruoi dùl dùl hlak a ni kha.