BU THUMNA
(Sam 73-89)
Pathien rorel indikzie
Asaf inpakna hlaa
73
1 Israelb chungah Pathien a thra,Lungrila thienghlimhai chungah.
2 Kei chu ka’n sui thlûk vàng chàng dam,
Ka sir inphet vàng chàng a um,
3 Mi chapohai ka’n hnar lei le
Mi rilo vangnei ka hmu chàng.
4 Nat hlak nei ve rêng rèng lo hai,
An hriselin an zuon a zâng.
5 Mi angin an buoi inrim nawh,
Mi tuor ang an tuor ve bok nawh.
6 Uong hi an thri hlî tak a na,
Nunrawngnain an inthuom a.
7 Mit pawng rak khop hiela thâuin,
An lungril a’n vèt biling a.
8 Mi an nuisaw, an hrilsiet bok,
Mi chungdelin an vau tom a.
9 An bâuin vàn an hauh ngam a,
An leiin hnuoi an hauh vong bok.
10 Chu lei chun miha’n an huor a,
An hnienghnarna tui chu dawnin,
11 “Iengtinam Pathienin a hriet?
Chunghnungtakin hriet a nei maw?”
Tiin an hril vel hlak si a.
12 Mi rilohai um dan tak chu:
Ngaingam muta, hausak thûr thûr.
13 Ka’n vong thienghlim thlawn el am aw-
Thil poi ka them naw sa khom a,
14 Sunni thlaka suknat tuor a,
Tûk tin zilna ka tuor el hi?
15 Chuonga lo ti ve chu ni lang,
I naua tiem tlak ni naw ning.
16 Hieng hi hriet thiem ka hang tum a,
Sienkhom a lo harsa hlè si.
17 Pathien hmun thienghlim ka lût chin,
An tawp dan ding ka hmu chieng tah.
18 Hmun innâlah i sie tawl a,
Sietna khurah i thlâk tawl a,
19 Mit khap kar loin sieng an ta,
Râpthlâk takin bohmang an tih.
20 Thranghar hnunga mang ang elin,
I tho har pha chun aw LALPA,
Hlim thla ang hnawl hmang tawl i tih.
21 Ka lungril a beidong chăng a,
Ka thlarau hmĕl an tŭr lai chun,
22 Invêt phulin lung ka mawl a,
I ta din sa kol ang ka nih.
23 Sienkhom, i bul ka’n chû tlat a,
Ka kut chang tieng i mi chel hlak.
24 Mi’n fŭiin i mi keihruoi a,
Nakie pha i ropuinaah,
I mi thruoi lŭt ding a ni si.
25 Nang naw tu am vanah ka nei?
Hnuoia khom hin nangma naw chu,
Tŭ dang thlàkhlà hrim ka nei nawh.
26 Ka taksa, lungril a chău thei,
Sienkhom ka lungril sukhrattu
Lungpui nghet chu Pathien a na,
Chatuona ka chanpuol a nih.
27 Nangma hlattu bohmang an ta,
A’n phattu che sukbo i tih.
28 Ka ta din Pathien hnai a thra.
LALPA Pathien chu bĕlbula
Hmang dingin ka lo thlang ta a,
A thilmak thawhai hril ka tih.