Lal ta dinga hnipekna
Solomon ta.
72
1 I rorel thiemna chu Pathien,Lal hi hung inrochungtir la,
Lal naupa kuoma ngei el hin,
I’n dikna inrochungtir rawh.
2 I mihai chungah fel taka,
Ro a hung rĕl theina ding le,
Mi retheihai chungthua khom,
Indik taka rêl thei dingin.
3 I mihai ta dingin tlânghan,
Malsawmna insuo hai sien la,
Muolhan felna ra insuo sien!
4 Mi rimsihai humtu ni a,
Tlasamhai phuhrûktu niin,
Nêksawrtuhai sir dè raw se.
5 Ni le thla khi an var sung phot,
Thrang la hung thar pei huna khom,
Ama chu inlal zing sien la.
6 Hlo sàm fai chunga raw hung sùr,
Hnuoi chăra inbaw huk huk a,
Ruopui vanawn sŭr ang ni sien.
7 An lal sungin mi indikhai,
Hung inthranglien tuol tuol hai sien,
Thla khin a var a’n suo sung chun,
Malsawmna pung tuol tuol raw se.
8 A lalram chun tuipui a’nthok,
Tuipui dang râl chen huop sien la,
Khawsak tuipuia inthokin,
Thlang kawlrawn chen zu huop raw se.a
9 Thlalera chêng hnam tinhaiin,
Chibai hung buk tawl hai sien la,
A hmêlmahan hnuoi liek raw se.
10 Tarsis le thlierkar hrang hranga,
Lalhai chun dawvan hung kaiin,
Thilpêk hung inhlàn hai sien la,
Seba le Saba lalhaiin,
Thilpêk hung inhlàn raw hai se.
11 Lalhai a hmaah kûn hai sien,
Hnam tinin a rong bawl raw se.
12 Thrangpui ngaia kotuhai chu,
Thrangpuiin hung somdawl tawl a ta,
Santu nei lohai san a tih.
13 Rethei châuhai lunginsietin,
Thi theina lakah hum a ta,
14 Nêksăwrtu le pâwngnêktuhai
Laka inthok san suok a tih,
A mita chu an hlu si a.
15 Ama chu ngal fîmin dam sien,
Seba rama rangkachakhai,
A kuomah hung pe raw hai se.
Mipuiin trongtraipek zing sien,
Ni tin mal sawmpêk raw hai se.
16 Ram puma chun a tontawin,
Bu le thlai thar suok treu sien la;
Muol tinah bu fawn dul dulin,
Lebanon tlanga bu anga
Hlawkin ra hung insuo hai sien,
Ram hlo hna inno dur angin,
Hung inthrang hlut hlut raw hai se.b
17 A hming chu kumkhawtluong khomin,
Rè ni um ngai hrim hrim naw nih,
Nisa khi a var sûng phot chun,
A hming inthang zuol pei sien la,
Hnam tinin a zâr zo hai sien,
Mi hamthra a nih ti raw se.
18 LALPA Pathien chu inpâk ro,
Israel Pathien inpâk ro,
Ama chauh hi a ni si a,
Hieng thil makhai thaw hlaktu chu.
19 A hming ropui chu inpâkin,
Kumkhawtluongin chawimawi unla,
A ropuinan hnuoi pumpui hi,
Hung sip raw se. Amen, Amen.
20 Hi hi Jesai naupa Davida
Trongtrai tawpna chu a ni tah.