Upa trongtraina
71
1 Aw LALPA nang ka hung bêl che,Ka muolpho ding phal lul naw rawh.
2 I felnain mi san suok la,
I nä ka tieng hin hung daw la,
Nangin mi hung san him ngei rawh.
3 Ka’n bìkna lungpui nang ni la,
Ka tlŭk lût rop theina ding chu;
Mi san him dingin thu pe rawh,
Ka lungpui le kul i ni si.
4 Mi rilohai kut a’nthok le
Mi suol râwng takhai kut a’nthok,
Mi san suok rawh, aw ka Pathien.
5 LALPA, nang chu ka beiseina,
Tleirawl a’nthok kan nghatna tak,
6 Ka pieng a’nthok ka ringsan tak,
Ka nu phǐng sunga inthoka,
Mi la suoktu chu nang i na,
Inpâk kumkhuo tâng ka ti che.
7 Vangduoina phurtua ang hiela
Mi tam tak ngai khom lo ni lang,
Nang ka’n bǐkna kul nghet i nih.
8 Ieng lai khomin i ropuina,
Chawimawiin ka’n păk ni tin hlak.
9 Upat hunah mi hnawl naw la,
Ka tha zŭr pha mi maksan naw.
10 Ka hmêlmahan an mi tâwng zing,
Phil tuma mi’n chăntuhai chu,
Mi sukse din an inrăwn khăwm.
11 “Pathien khomin a zamsan tah,
Hnot thlûr ei ta, man tang ei tiu,
Santu a nei ta nawh” an tih.
12 Aw Pathien, mi’n hlat ngai naw la,
Mi san din hung vat rawh, Pathien.
13 Mi beituhai chu muolphoin,
Sukbohmang ni vong hai sien la,
Ka sietna ding zongtuhai chu,
Inzakin hmaimăwk raw hai se.
14 Kei chun beisei zing ka che a,
Inpâk zuol deu deu ka ti che.
15 Hrein sui suok zo naw lang khom,
I felna le sandamna thu,
Ni tin hrilin puong pei ka tih.
16 I thilthaw ropuizie puongin,
Hril dar ka tih LALPA Pathien,
Ï’n dikzie chauh hi hril ka tih.
17 Ka tleirawl laia inthokin,
Aw Pathien i mi’n chŭktir a,
Tu chen khom hin i thilmak thaw,
Ka la hril ngat ngat hlak a nih.
18 Lu-ah kêl sam tro ta sienkhom,
Mi maksan naw rawh, aw Pathien;
I ropuizie le thilthawhai,
Thrang la thar pei dinghai kuoma,
Ka hril hma chun mi umpui rawh.
19 Aw Pathien, thil ropui thawtu,
I felnain vanhai a tong,
Nangma ang tu’m an um hrim a?
20 Buoina tam mi’n tuortir la khom,
Ka nun hi sukhar nawk i ta,
Khur inthuk taka inthokin,
Mi hung la suok nawk ngei i tih.
21 Mi chawisang nawk zuol sauh i ta,
Mi hung thlamuong nawk ngei i tih.
22 Aw ka Pathien, i ringumna,
Tringtrang keiin inpâk ka tih.
Aw, Israelhai Mithienghlim,
Tringtrang leh inpâk ka ti che.
23 I’n pàkna hla ka sak hunah,
Ka hmŭr hlimin khêk suok a tih,
I mi’n tlan sa ka ni si a.
24 I thilthaw indikziehai chu,
Sŭnnithlâkin hril dar ka ta
Mi sukse tumtuhai hlak chu,
Muolphoin an chi-ai ta si.