Thrangpui hnǐna
Davida ta,
‘Lili’ thlûka sak ding
69
1 Aw Pathien, mi san suok rawh,Ka rîng chen ka pil ta a,
2 Chirdûpa hin ka’n tâng a,
Sir san ding hrim a um nawh.
Tui inthŭk tieng ka tlung tah,
Tui fawnin a mi tuom vel.
3 Thrangpuitu ka konaah,
Ka lo chău zo dêr ta a,
Ka dang khom a’n hil zo a,
Pathien ka thlirna lamah,
Ka mit khom a’n thim zo tah.
4 San boa mi theidatu,
Ka sam zai nêkin an tam;
Khêla mi sukse tumtu,
An tamin an hrâng hle a,
Ka’n rûk naw khom thawluinan,
An mi’n thung kîrtir a nih.
5 Ka’n vêtzie i hriet, LALPA,
Ka thiem nawzie i lakah,
Ieng khom thup ka nei dĕr nawh.
6 Aw Lalpa, Iengkim LALPA,
Nangma beiseituhai chu,
Keima leiin tu el khom,
Sukzakin um naw raw se.
Aw, Israelhai Pathien,
Nangma hung zongtuhai chu,
Keima leiin tu el khom,
Muolphoin um naw raw se.
7 I leiin hmŭsit ka tuor,
Meng ngaina ka hriet ta nawh.
8 Ka unauhai laka khom,
Mikhuol ka lo ni tah a,
Ka nu nauhai laka khom,
Ram dang mi ka lo chang tah.
9 I in ta dinga thrahnem,
Ka ngainan a mi lem zo,
Chêksoltu cheksolna che,
Ka chungah a tla ta si.
10 Trapa bu ka nghei chângin,
Mi’n an mi hmusit zui a,
11 Saiip ka sil chang khomin,
Fiem pawlawtnan an mi hmang.
12 Kotkhara inthrunghai chun,
Hmusitin an mi nuisaw;
Zu ruihan nuizatbûrah,
An mi lo hmang bok si leh.
13 Aw LALPA, kei ruok hi chu,
I lungawi lai huna hin,
I kuom tieng ka hung trongtrai;
I hmangaina chuoi lo chun,
San him di’n mi hung don rawh.
14 Chirdûp a’nthok mi hum la,
Ka pil hmang ding phal naw rawh;
Mi theidatu lak a’nthok,
Nangin mi hung san suok la,
Li inthuk a’nthok khomin.
15 Tui lien mi’n chîmtir naw la,
Li rilin mi lem naw sien,
Thlănin mi dol naw raw se.
16 I hmangaina le thratnan,
Mi hung don ngei la LALPA,
Zangaina i hau leiin,
Ka tieng hin hung ngha hrăm rawh.
17 I siehlaw lakah i hmel,
Thup naw la, mi don vat rawh,
Ka bei a dong a ni hi!
18 Hung hnaiin mi san suok la,
Hmêlma lakah mi’n tlan rawh.
19 An mi hmusit dan i hriet,
An mi sukhmaimawk dan khom,
Ka hmêlmahai i hriet vong.
20 An mi hang hmusit dan hin,
Ka lung a sukse hle a,
Chan lam boin ka um a;
Mi lainat ka beisei a,
Sienkhom an um dĕr naw a,
Thlahuoltu ding ka hmu nawh.
21 Ka bu-ah tûr an pol a,
Ka dangchâr hnĕmna dingin,
Zu thûr an mi pek lem si.
22 An ruoi chu châng inchang sien,
Inremna ruoi an kǐl khom,
Bilah inchangpek raw se.
23 An mithai sukdelpek la,
Khuo hrim hmu thei naw hai sien,
An zâng inkûl song raw se.
24 I lungsen bun khum tawl la,
Lungpuomin nangchîng tawl rawh.
25 An chĕngna ram vong sien la,
An in rausan chang raw se.
26 Vuok tuorhai an soisak a,
Hliem tuorhai natzie dam chu,
An titi inhnik a nih.
27 I hremna ding sukpung la,
I sandamnaah chan rêng,
Inneitir hrim hrim naw rawh.
28 Hringna bua inthokin,
An hming chu thâi bo dai la,
Mi felhai hming chuongnaah,
An hming chuong ve naw raw se.
29 Kei na tuorin ka’n rûm hi,
I sandamnan aw Pathien,
Nangin mi humhim tlat rawh.
30 Pathien hming zaia chawiin,
Lawmthu leh inpak ka tih.
31 Chu chu Lalpa hmaa chun,
Ran inhlàn nekin a hlu,
Bawngchal lien inhlàn nêkin.
32 Neksâwrhan hmu’n lawm an ta,
Nangni, Pathien zongtuhai
Lungril khom tuoi thar a tih.
33 LALPAN retheihai a hriet,
Saltanghai a’n zàpui nawh.
34 Hnuoi le vanin inpâk ro,
Tuipui le a sunga mi,
Thilhring chêng po po khomin.
35 LALPAN Zion hum a ta,
Judai rama khuohai khom,
Hung tungding nawk vong a ta,
A mihai chun hluong an ta,
Ram chu rochung ta’ng an tih.
36 A siehlaw suonhan ram chu,
Hung rochung sawng pei an ta,
A hming ngainatuhai chu,
Chu rama chun chêng an tih.