Hnam ta dinga hnèna
Davida inpakna hla.
68
1 Pathien chu hung inthok dok sien,A hmêlmahai hung phǐn dar sien,
A hmaah tlân dar raw hai se.
2 Thliin meikhu a lĕn angin,
Nangin hung lĕn hmang vong tawl la,
Meia khuoihlû em tui angin,
Misuolhai chu Pathien hmaah,
Intui ral vé vong raw hai se.
3 Mi felhai chu hlim hai sien la,
Pathien hmaah lawm hai sien la,
Hlim le lawmin um raw hai se.
4 Pathien kuomah zâi hla sakin,
A hming chawimawiin inpâk ro,
Sûm chunga lêng chu inpâk ro,
A hming chu LALPA a ni si,
A hmaa chun hlimin lawm ro.
5 Hmun thienghlima chêng Pathien chu,
Fahrahai ta din pä a na,
Hmeithaihai ngaituotu a nih.
6 Mi vâkvăihai chu Pathienin,
Chĕngna in a buotsaipĕk a,
Intânghai chu a thruoi suok a,
Hamthratnain a vûr tawl a,
Hel hmanghai chun ram trawl an hluo.
7 Aw Pathien, i mihai thruoi a,
Hmun se ram i hrawpui lai khan,
8 Sinai tlangah, Pathien hmaah,
Israel Pathien hmaa chun,
Simkhawlei a’n hnǐng dur dur a,
Vanin ruo a’n bawtir huk huk.
9 Aw Pathien, ruopui vanàwn hiel,
Nangin i hang insŭrtir chun,
I ram pêk trâwl hâwp ta hnung chu,
Hnâwng ramah i hung siem thar a.
10 I mihan umhmun an khuor a,
I hnienghnârna chun aw Pathien,
Retheihai i hung somdawl hlak.
11 LALPA chun thu chu a pêk a,
Nuhmei ruolin an puong dar a:a
12 ”Lal le an sipai ruolhai chu,
An tlàn se hum hum el” tiin.
In nghàktu nuhmei ruolhaiin,
Râllâk sumhai an insem a,
An inkulna hmun ngeia chun,
13 Ran huonga riekhai chen khomin,
Vathru lim, tangkaruoa siem,
A thla ki rangka-dartui luon,
An chang tawl ve phak hiel a nih.
14 Iengkim Pathien El Shaddaiin,
Lalhai a hang phǐn dar zet chu,
Zalmon-ab vûr tla ang a nih
15 Aw Basanc tlang mawi le ropui,
Tlang sîp insi khup el hai chu,
16 Ama rorêlna hmun ding le
Kumkhawa a chêngna dinga,
Pathienin a thlang tlâng a na,
Ieng leia in thǐk am a na?
17 A tawlailir a sînga sîng,
A sanga sang tam tak leh chun,
A hmun thienghlima thrung dingin
Sinai thlalèra inthokin,
LALPA Pathien chu a hung ie.
18 A hmun insàngah a kái a,
A sal manhai a thruoi dum dum;
Mihai thilpĕk a lo dong a,
Hel hmanghai khomin an hung pĕk;
Chu tlânga chun LALPA Pathien,
A hung chêng zing theina dingin.
19 Ni tina phur mi sawk hlaktu,
Ei LALPA le ei Sandamtu,
Pathien inpâkin um raw se.
20 Pathien chu ei Pathien a na,
Aman a mi san him hlak a;
Thìna laka mi hum thei chu,
Laltak ei LALPA chauh a nih.
21 Pathien chun a hmêlmahai lu,
Suol chîng mi lu inbukhai chu,
Matheiloin vaw koi a tih.
22 “Basan a’nthok hung thruoi ka ta;
Tuipui li truong a’nthok khomin.
23 An thisen chu la pal in ta,
In uihaiin an dit tawkin,
La liek an tih” LALPAN a tih.
24 I hmun thienghlim tieng chu pan a,
I hung tung lai khan aw Pathien,
Mipuiin an thlîr thrup che a,
Ka Lal Pathien i fe lai chu.
25 Zaipawlhaiin hma an thruoi a,
Rimawi remtuhan an zui a,
A laia chun nunghak ruolin,
Dar benthek an ben tawl bok a.
26 “Pungkhawm lai Pathien inpâk ro,
Israelhai pungkhawmnaah,
LALPA chu inpâk ro” an tih.
27 An mi tlum tak Benjamin hnam,
A hma tawnga chun an thrang a,
Juda hnama lal nauhaiin,
An hnungah an zui dùl dûl a,
Jebulun le Naftali hnam
Lalhai chun an hung zui bok a.
28 Aw Pathien, kha hmaa thilmak,
I mi thawpek hlak ang bok khan,
I thilthawtheina ngei el kha,
Mi hung suklangpek nawk hrăm rawh.
29 Jerusalema i Tempul
Leiin i kuomah thilpekhai
Lalhan hung inhlan an ti che.
30 Phairuong hmuna sa hrâng tlahai,
Bawng tuoi laia bawngchal huoi ang,
Hnam tla khawmhai khu zuk zil rawh,
Sie làkna ngot zongtuhai hi,
I kein hung sirde tawr la,
Indo châk dop dop hnamhai hi,
Nangin hung phǐn dar vong tawl rawh.d
31 Chuongchun Aigupta a’nthokin,
Ram palaihai hung tir an ta,
Kuse ram khom Pathien hmaah,
La hung intuklût ngei a tih.
32 Aw, hi khawvela lalramhai,
Pathien kuomah zaihla sakin,
LALPA inpâkna hla rem ro.
33 Ama chu tiena tlanga um,
Van insâng chunga chuong a na,
Inring takin a khêk, ngai ro.
34 Pathien thilthawtheizie puong ro,
Israel chunga lal a na,
A hrătna chu vănah a um.
35 A hmun thienghlima um Pathien,
Israelhai Pathien ngei chu,
A lo va răp-um ngei de aw!
Hrătna le thilthawtheina chu,
A mihai kuomah a pêk hlak.
Pathien inpakin um raw se!