Inpâkna le lawmthu hrilna
Davida inpakna hla.
65
1 Aw Pathien, Zion tlangaInpâk i phu hlie hlie a;
I kuoma kan thutiem chu,
Hlen ni la um ngei a tih.
2 Kan trongtraina ngaithlatu,
Mi tinin pan an ti che.
3 Suolnan a mi chǐm laiin,
Kan bawsiethai i ngaidam.
4 I bula chêng ve dinga,
I thlanghai chu an hamthra.
I Tempul thienghlima mi,
I hnienghnărna chu tlănin,
Kan tlai ding a ni si a.
5 Aw mi Sandamtu Pathien,
Râpthlàk le indik taka,
Thil thawin i mi don a,
Kawl kil le tuipui tawp chen,
Beisei innghatna i nih.
6 I hratnan tlanghai i’n din,
Thilthawtheinan i sip a,
7 Tuipui inrûm ri hum hum,
Tuifawn insawk hlup hlup hai,
Mipui so mur mur hai khom,
Nang chun i sukrê vong thei.
8 Hnuoi hmun tawpa chenghai khom,
I thilthaw’n a râp tawl a;
Ni a suok le tlăk hunah,
Lawmna hla a thangkhawk hlak.
9 Hnuoi kanin, tuiin i chawm,
Rip takin i sukhnienghnăr;
Pathien vadung tinhai chu,
Tuiin i sung sip vong a,
I tiem anga bu le bâl,
Mihan an hau theina di’n.
10 Changkuong thlûr tin sukhnawngin,
A bieltlânghai sukruolin,
Ruotui i’n chie hniptir a,
Thlai an hung inchor hlup hlup.
11 Kum tawpah a tontawin,
Bu le bâl i’n thartir a,
I tawlailir tina chun,
Bu i sung vŭm hnĕr hnûr a.
12 Thlaler ram trawlah hlo hna,
Inthrangin an zǐng dum dur,
Muol tin chu lawmnan i’n thuom.
13 Hlo hring duphai chu tlânin,
Ran ruol an tla dup dup a,
Phai zawlah bu a tlim hmur,
Lawm hla sak ri a’n zăm vel.