Inpâk le lawmthu hrilna
Inpakna hla.
66
1 Leihnuoia chêng po pohai,Hlimin Pathien inpâk ro;
2 A hming ropui chawimawiin,
Lawm hla sakin khêk suok ro.
3 “I thilthaw a mak rapthlak!
I hrât khawkhêng êm leiin,
I hmaah i hmêlmahai,
Triin an inthin hăwp a.
4 Hnuoi mi po po bokkhupin,
I hmaah an hung kŭn a,
Î’n pâkna hla an sak a,
I hming an chawimawi” tiin,
Pathien kuoma chun hril ro.
5 Hung en tum, hringmi laia
Pathien thilthaw zozai hi,
A va hang răpthlăk de aw!
6 Tuipui inthûk takhai chu,
Hnuoi chârah a’n changtir a,
Kein tuipui an kăn a,
A chungah ei hlim hle kha.
7 A hratna’n ro a rêl zing,
Hnamhai a enthlâk zing a,
Helhai huongtâu naw raw se.
8 Hnamhai, Pathien inpâk ro,
A’n pâkna ri inthang sien;
9 Hringdamin a mi’n umtir,
Ei tlŭk ding a mi vĕng hlak.
10 Aw Pathien, nangma ngeiin,
Meia tangka fie angin,
I mi fie fai ta kĕl a.
11 Lĕn chângah mi’n awktirin,
Phur rik tak i mi’n phurtir.
12 Kan chungah mi i’n chuongtir,
Mei le tui lien kan pal tlang;
Nisienkhom, hmun thawvengah,
Nangin i mi thruoi lut tah.
13 I Tempulah hung ka ta,
Pumraw thilhlân inhlànin,
Ka thutiem hlen ngei ka tih-
14 Ka lungzîng lai, bàu ngêia
Thu ka lo intiem tahai kha.
15 Ran thâu thâu inhlàn ka ta,
Beram chal inhlàn ka ta,
Bawngchal khom inhlàn ka ta,
Kèlchal inhlàn bok ka tih.
16 Pathien trituhai hungin,
Ka thu hi hung ngaithla ro;
Ka chunga a thilthawhai,
Iengkim lo hril ka ti cheu.
17 Băuin ama ka ko a,
Ka lei a’n pâknan a sip.
18 Suol lawm rûk mi ni lang chu,
LALPAN mi ngaithla naw nih;
19 Pathien chun mi ngaithlain,
Ka hnǐna a lo ngaisak.
20 Ka trongtraina hnawl lo a,
A hmangaina tawp ngai lo,
La kîr ngai lo Pathien chu,
Inpâkin um zing raw se.