Himna hnia trongtrai
Davida hla var.
Saulan that dinga an huol laia mi.
“Sukse naw rawh” ti thlûka sak ding.
59
1 Aw Pathien, hmêlma lakah,Nangin mi hung san suok la,
Mi dotuhai laka chun,
Nangin mi hung hum him rawh.
2 Suol thawtuhai laka chun,
Nangin mi hung san suok la,
Thisen inruihai lakah,
Nangin mi hung sandam rawh.
3 Aw LALPA, ka bawsiet le
Ka suol thaw lei ni loin,
That tumin an mi’n chăn a,
Mi tawrot ruol an pung khawm.
4 Ieng thaw suol lo ni lang khom,
Bei tumin an mi’n huol zing.
Mi san dingin hung tho la,
Ka chan harsatzie en tam!
5 Aw LALPA, Iengkim Pathien,
Israel Pathien, hung thoin,
Hnam danghai hi hrem tawl la,
Dawhaa thil suol phiertu,
Tu khom hlà nei dêr naw rawh.
6 Zàn tieng an inhawr khawm a,
Ui anga mi inngurin,
Khaw dung khaw vai an fang a.
7 Mi an bauh nasatzie hi,
Hang ngaithla ve hrim hrim ta!
An kam suok chu kawlhnâm ngei,
Inchemharnan a sip a,
“Tu’m a mi ngaithla an um?”
An la ti nawk ta deu deu!
8 LALPA, anni chu nangin,
Hung nuizat tawl hleng i ta,
Hnam tin nuizatbûr i tih.
9 Aw ka Hratna, thlir ka che,
Ka Pathien, ka kulpui nghet,
10 Ka hmangai Pathien i nih.
Aman ka hma thruoi a ta,
Mi hmusit hlaktuhai chu,
Mi’n nuisawtir ngei a tih.
11 Aw LALPA, ka phaw i nih.
Nangin anni that naw rawh,
Chuong naw chun ka mihaiin,
Anni theinghil rawi an tih;
Invâkvaitir tawl lem la,
I hratnan suktlawm tawl rawh.
12 Suol porche’n an bău a sip,
An hmûra thu suok tinrêng,
An chaponan awk tawl sien;
Trongsie inphur le khelhril,
An hmang êm êm hlak si a.
13 Lungsenin sukbohmang la,
Ram dĕrin sukchimit rawh.
Chuongchun, Jakob Pathienin,
Ro a rèl a nih ti hi,
Kawl kil chen inthang raw se.
14 Zàn tieng an inhawr khawm a,
Ui anga mi inngurin,
Khaw dung khaw vâi an fang a.
15 Fak ding an dap vêl ruoi a,
Khop tâwk an ngà naw lem chun,
Zàn khuoin an inbauh hlak.
16 Kei ruok chun i hrătzie hi,
Hrilin inpâk ka che a,
I hmangaina chuoi lo chu
Zîng hmângin inpak ka tih;
Mangang nia ka’n bǐkna,
Ka kulpui i ni si a.
17 Ka Hrătnä, nang chawimawiin,
Hlain inpâk ka ti che.
Mi hmangaitu ka Pathien,
Ka kulpui i ni si a.