Ruol ringum lo
Davida hla var.
Tringtrang le rem ding
55
1 Aw Pathien, ka hnǐna ngai la,Mênah mi thlakpêk lul naw rawh;
2 Mi ngaivenin mi hung don rawh,
Buoina’n a mi chǐm a ni hih.
3 Hmêlma rawlin a mi hămzǐng,
Mi rilohai hnawchĕpna chun.
Ka chungah buoina an siem a,
Lungsenin an mi hrăng khum hih.
4 Ka lung hi an lap dor dor a,
Thi inlâu zingin ka um a.
5 Tritnan thaah a mi man a,
Inlâuin ka’n thin dor dor a.
6 “Vàthru ang thla nei ve lang chu,
Chawl hadamna hmun ding zongin,
Hla takah vuong hmang ta’ng ka ta,
7 A nih, ram hla takah vuongin,
Thlalĕrah umhmun khuor ka ta,
8 Thlipui le ruopui laka chun,
Inbîkna ding hmun him zongin,
Fe hmang inrang ka tih” ka ta.
9 Aw LALPA, mi rilohai hi,
An ngaituona sukchî-ăi la,
An trong khom hung sukbuoipek rawh,
Inpawngnêkna le inbeina,
Khawpuia hin a sip si a.
10 Sŭn-zăn zomin an invăk a,
Indemna le inhrilsietnan,
A khawpui sŭng hi a sip a.
11 Sietna sipaihai an hrăng a,
Inpawngnêkna le inhlĕmnan,
Kotthlêr an rielsan ta ngai nawh.
12 Hmêlmahan an mi nuisan chun,
A tuor dan tak a la um a;
Dotuhan an mi’n huol vel chun,
Inbîkrŭksan thei a ni bok.
13 Nisienkhom, nang i lo ni si,
Keima ang ela ka ngai hlak,
Ruolcham ang ela ka pawl ngei,
14 Ka titipui mel mel hlak le,
Mipui ruola Pathien in tieng,
Pana ka’n sompui hlak ngei kha!
15 Hmêlmahai chu an hun tlung hma’n,
Thina’n hung nang thut tawl sien la,
A hringhrànin Seol panin,
Muol liem thla diel tawl raw hai se,
Suol bu khuorna an ni si a.
16 Kei ruok chun Pathien ka ko a,
LALPAN mi hung sandam a tih.
17 Zîng, sŭn, zăn le ieng lai khomin,
Ka’n rŭm ri a tlung tung zing a,
Ka rawl lo hre ngĕi ngêi a tih.
18 Mi dotu tam hle hai sien khom,
Himin mi san suok ngei a tih.
19 Tiena inthoka rorêltu,
Pathien chun mi lo ngaithlain,
Anni chu hung suktlawm a tih;
An inlamlĕt nuom ngai naw a,
Pathien trǐna an nei bok nawh.
20 Ka’n koppui chun a ruol doin,
Kan thuthlung chu a bawsiet a.
21 A kam suok thu chu a tlor a,
A lungril sungrila ruok chu,
Indona a’n lêng zing hlak a;
A thu suok chu hriek nĕk khomin,
Tlorin innâl hlak sienla khom,
Kawlhnâm ngei tak ang a ni si.
22 I lungkham phurrik iengkim chu,
LALPA chungah innghat hlak la,
Aman sâwk zăngkhăi a ti che,
Mi felhai tlŭk phal ngai naw nih.
23 Mi rilohai chu aw Pathien,
Khuorkhurûmah pei tawl i ta,
Thisen insuo chǐng mihai le
Khêla mi hlĕm hmang mihai chu,
An damsung hun ding chenve khom,
Dam khawsuok tawl ngai naw ni hai.
Kei ruok chu nangmaah ka’n nghat.