Thupha chawina
Davida inpakna hla. Bathseba a
thruoi hnunga, zawlnei Nathan
inlang truma mi.
51
1 I hmangaina chuoi lo zârin,Ka chungah zangai rawh, Pathien,
Zangaina i hauzie angin,
Ka bawsietnahai thâi bo rawh.
2 Ka khawlonahai sawp fai la,
Suola inthok mi tlêng fai rawh.
3 Ka bawsietnahai ka hriet a,
Ka suolna ka hmasom zing a.
4 I lakah thil suol ka thaw a,
A nih, i mit hmua ngei chun,
Thil suol ka lo thaw tah a nih.
Ka chungthu i rêl indik ie,
Demna ding hrim hrim i um nawh.
5 Ka nu sŭnga ka’n sieng laiin,
Suol sá hrima von ka ni a,
Ngai ta, suol saa pieng ka nih.
6 Sŭng ril tienga takna i dit,
Chuleiin ka sŭng ril takah,
I varna thu mi’n chuktir rawh.
7 Husawpa thèin mi’n thien la,a
Chuongchun hung inthieng tang ka ta,
Sawpin nangin mi’n sil fai la,
Vûr nêkin hung vâr tâng ka tih.
8 Hlim le lawm ri mi’n hriettir la,
Ka ru tliek khom hi hlim raw se.
9 Ka suol lakah i hmai hup la,
Ka bawsietnahai thâi hmang rawh.
10 Lungril inthieng mi siempek la,
Thlarau nghet tak ka sungrilah,
Intuoi thartir nawk rawh, Pathien.
11 I lakah mi hnawl hmang naw la,
I Thlarau Thienghlim ka lakah,
Mi la hmangpek ngai bok naw rawh.
12 Sandam hlimna mi pe nawk la,
Thuawina thlarau mi pein,
Chu chun nangin mi suknghet rawh.
13 Bawsetuhai chu i lampui,
Kawkhmung ka ta, lamlèt an tih.
14 Aw ka Pathien, mi sandamtu,
Thisen insuo leia thiem naw,
Ka changna laka inthokin,
Mi san suok la ka va ti ngei!
Chuongchun, i felna inpakin,
Rawl tawp insuo thei ta’ng ka tih.
15 LALPA, ka hmùr mi hongpek la,
I’n pâkna hla puong suok ka tih.
16 Hlànbiekna i lawmzawng an nawh,
Ni sien chu hung inhlàn ka tih;
Pumraw thilhlân i lawm bok nawh.
17 Pathien lawmzawng inhlànna chu,
Lungril tet koi vong hi a nih;
Lungrila insîr ngawi ngawihai,
I hmusit ngai nawh, aw Pathien.
18 I ditzawng angin Zion chu,
Hnienghnarnan hung vur nawk ta la,
Jerusalem kul banghai khom,
Tungdingin indin thar nawk rawh.
19 Chuongchun, i lawmzawng hlànbiekna,
Indik tak chu inhlàn an ta,
Pumraw thilhlânah bawngchalhai,
I maichàmah inhlân an tih.