Pathien biek dan indik
Asaf inpakna hla.
50
1 LALPA Pathien Ropui tak chun,Ni suokna sak kawla inthok,
A tlăkna thlang kawlrawn chenin,
Thu hrilin hnuoi hi a ko a.
2 Khaw mawi famkim Zion a’nthok,
Pathien var chu a êng suok hlak.
3 Ei Pathien a hung, to naw nih,
A hmaah mei a’n hlap puot puot,
A vêlah thlipui a hrâng vêl.
4 Chung vàn a ko, hnuoi a ko bok,
A mihai chungthu rêlpêk di’n.
5 “Hlànbiekna ka kuomah thaw a,
Thu thlungtu serhranhai ko ro”
Tiin kona thu a’n suo a.
6 Van khin a’n dikzie a puong a,
Rorêltu chu Pathien a nih.
7 “Ka mihai, ka thu ngaithla ro,
Aw Israel, khing ka ti che,
Kei Pathien, in Pathien ka nih.
8 Ka kawk naw cheu, in thilhlàn lei,
In hlànbiekna a hung tlung zing;
9 In bawngchalhai ka mamaw nawh,
In ran huonga kelchalhai khom.
10 Ram sa tinrêng ka tâ a nih,
Tlâng tina chêng ransahai khom;
11 Tlânga vate tin ka hriet vong,
Thil hring po po ka ta a nih.
12 “Trâm khom ni lang hril nawng ka cheu,
Khawvel le a sunga umhai,
Keima ta vong an ni si a.
13 Bawngchal sahai dam fa hlakin,
Kêl thisen ka dawn hlaka mawh?
14 Pathien kuomah lawmthu hrilna,
Hlànbiekna inhlàn lem unla,
Chunghnungtak kuoma in thu chu,
In tiem angin hlen suok unla,
15 Harsat niah mi ko unla,
Keiin san him ka ti cheu a,
Nangnin kei mi chawimawi ve ro.”
16 Mi rilohai kuoma ruok chun,
Pathienin hieng hin a hril a:
“Ka dan thuhai inzawt ding le,
Ka thuthlunghai sâm hlak dingin,
Tu’n am phalna a pêk cheu a?
17 Ka thuchâhai in theida a,
Hnung tieng in mi nghatsan tawl a.
18 Rûkru in inthuruolpui a,
Uire zawlpuon in zawnpui a.
19 Suol hrilna din bău in phong a,
In lei khêl hrilna’n a’n khap a
20 In unauhai in hrilsiet a,
In laizawnhai in hêk bok a.
21 Hieng po po hi in chǐng hlak a,
Sienkhom ka tosan zing cheu a;
Nangni anga lungril put ve,
In mi sawn hman hiel a ni kha.
Sienkhom tu’n hmaisanah kawkin,
In thiem nawzie hril ka ti cheu.
22 “Pathien theinghil chînghai, ngai ro,
Chuong naw chun pot chen ka ti cheu,
Santu ding hrim nei naw ti niu:
23 Lawmthu hrilna inhlàntu chun,
Keima a mi chawimawi a na,
Lampui indik hrawtu khomin,
Pathien sandamna hmung a tih.”