Hausakna ring tlak lo
Kora pawlhai inpakna hla
49
1 Mi tinrênghai, ngaithla unla,Khawvela chêng po pohaiin,
In na mi lo dawpêk seng ro.
2 Mi chîn mi lien, hausa rethei,
In rêng elin lo ngaithla ro.
3 Varna thu kan zawt ding a na,
Ka lungril ka phor suokhai chun,
Hriet thiem theina pe’ng a ti cheu.
4 Thuvar tieng ka na dawng ka ta,
Tringtrang keiin thukhirhai chu,
Ka hung hril fie ding a ni hih:
5 Hmêlma rilohai suolna chun,
Sîr tinah mi’n huol vel sien khom,
Hun thra loah iem trìng ka ta?
6 An hausakna inhnĕmpuiin,
An hnienghnàrna an uongpui hlak.
7 Tu khomin mi danghai hringna,
Intlanpêk thei a ni naw a,
Pathien kuomah intlanna man,
Tu khomin pèk thei a ni nawh.
8 Hringna man chu a to taluo,
Ieng po khomin a’n tlan zo nawh,
9 Thlàn thima hmon ve lo dinga,
Chatuona hring ding a ni chun.
10 Invêt le mâwlhai ang bokin,
Mi varhai khom an thi ve a,
An hausakna mi dang ta di’n,
An maksan hlak ti hi hre ro.
11 An ramin an hming hiel putin,
Thrang tam lo hluo ta hai sien khom,
An chang sun chu an thlàn a na,
An kumkhaw in ni zing a tih.
12 Ieng anga neinung khom ni sien,
Mihriem chun a dai săwt ngai nawh,
Ramsa angin a bohmang hlak.
13 Mania innghattuhai chu,
Chuong ang chu an chan a ni hlak,
An thu khŭkpuituhai chan khom.
14 Beram anga thi ding an na,
An vĕngtu chu Thǐna a nih.
Thlăn thimah liem thla nghăl an ta,
An taksa chu hmon hmang a ta,
Mithi khuoa chun um an tih.a
15 Kei chu Seol kut a’nthokin,
Pathienin mi’n tlan suok a ta,
Aman mi lo lâwm ngei a tih.
16 Mi an hlawk phâ inhnar naw rawh,
An nei a pung thûr thûr khomin.
17 An thi phâ som nei naw ni hai,
An thil neiin zui bok naw nih.
18 An dam lai hamthra inti’n,
Mihai ngaisang hlaw hai sien khom,
19 Var um nawna thlăn inthimah,
An pipuhai la fin an tih.
20 Hriet thiemna nei lo hausa chu,
Ramsa anga boral a nih.