Inpâkna hla
Davida inpakna hla.
40
1 LALPA chu ka nghâk fan fan a,Ka rawl hrein a hung ngha a;
2 A mi kei suok, chirdûp a’nthok,
Ka’n tăngna chirdûp a’nthok chun;
Lungpui chungah min ngirtirin,
Sirsan nghet tak a mi siempek.
3 Ka băuah hla thar a sie a,
Ei Pathien inpăkna hla chu.
Mi tam takin chu chu hmuin,
Triin LALPA chu ring an tih.
4 Mi chapohai tieng ngha lo a,
Pathien limhai khom hnawl hmang a,
LALPA ringtu chu a hamthra.
5 LALPA Pathien, kan ta dingin,
Thil mak tam tak i thaw hlak a;
Kan ta dinga i remruothai,
Tu khomin puong sĕng naw ni hai;
Tiemin hril suok ding ni inla,
Puong sĕng ngăina hrim a um nawh.
6 Hlànbiekna le thil inhlànhai,
I thil dit tak a ni naw a;
Suol ngaidamnaa ran inhlàn,
I thil phût tak a ni bok nawh.
I thu ka hriet theina dingin,
Ka nä i mi hongpek lem si.
7 Chuongchun, “Ngai ta, tu hin ka hung,
Dàn bu-ah ka chanchin an ziek,a
8 Aw ka Pathien, nangma ditzawng
Thàw hi ka va châk ngei de aw!
I dànhai chu ka lungrilah
A châm zing hlak” ti’n ka hril a.
9 I sansuokna thu lawmum chu,
Pungkhawm tam tak lai ka puong a;
Ka bău ka’n chǐp nawzie thu khom,
LALPA nang ngei hretu i nih.
10 Ka ip ngai nawh, i felna thu,
I ringumna le sandamna
Thu chu ka tlanginsampui hlak.
I hmangaina chuoi ngai lo le,
I ringumna dul ngai lo chu,
Pungkhawmhai lai ka ip ngai nawh.
11 Keima lakah i zangaina,
La kieng naw rawh, aw ka LALPA;
I hmangaina le ringumnan,
Kumkhuoin mi huol him zing rawh.
12 Tiem seng lo buoinan an mi’n huol,
Ka bawsietnan a mi chǐm a,
Khuo khom ka hmu thei ta si nawh;
Ka sam zăi nêkin a tam lem,
Ka lung a va hang dong ngei aw!
13 Aw LALPA, lunginsiettakin,
Hung vat la, mi hung san suok rawh.
14 Ka hringna la tumtuhai chu,
Muolphoin chî-ăi hai sien la,
Ka sietna ding phiertuhai chu,
Hmâimăwkin tlân se raw hai se.
15 “Chei leh, Chei leh!” tia khêk a,
Mi’n riem khumtuhai po po chu,
Inzakin kûn tlok tlok raw se.
16 Nangma zongtu taphothai chu,
Nangmaah chun hlimin lawm sien;
I sandamna dittu poin,
“LALPA chu a va ropui ngei!”
Tiin lawm hlâ rem rop raw se.
17 Kei pasie le riengvai tak hi,
LALPAN a mi ngaituo hlak si;
Mi thrangpuitu le sansuoktu,
Aw ka Pathien, muongchâng lul naw.