Hringnun tâwite
Davida inpâkna hla.
Jeduthun ta ding.
39
1 “Ka lam hraw en fimkhur ka ta,Suol lakah lei vêng thra’ng ka ta,
Mi rilohai an um sung chun,
Ka hmŭr khuop tlat ka tih” ka ta.
2 Sienkhom thu thra hril dêr lo a,
Bău phong loa ka um hlak chun,
Ka lungzingna a pung zuol si.
3 Ka lungril hi a sahâl a,
Ka dawnkhawl chàng a mi hlieu a,
Ka bău ka phong el tah a nih.
4 LALPA, ka hringnun tawp hun ding,
Hun ka la nei zât mi hril la,
Ka nun tawizie mi’n hriettir rawh.
5 Ka dam sŭng hi kutpha bok chen,
Nangma ta din ieng khom an nawh,
Dam sûng hi thuok chen chauh a nih.
6 Sùk le tunga lawn mihriem hi,
Hlimthla ang mei mei chauh a nih;
Iengma lo thil a buoipui a,
A neitu ding hre si loin,
Rosum tinrêng a khawl khawm hlak.
7 LALPA, tu’n tu’m beisei ka ta?
Ka beisei chu nang chauh i nih.
8 Bawsietna lakah mi hum la,
Mi invêthan nuizatbûra,
An mi siem ding phal lul naw rawh.
9 I mi’n tuortir a ni leiin,
Ka to trok a, bău ka phong nawh.
10 I mi vuokna hruol la hmang la,
I kut ka tuorna ka chău tah.
11 Mi suolhai zila thununin,
An hausakna hângthîm angin,
I’n fak siettir zo hlak si a;
Mihriem hi thuok ang chauh a nih.
12 LALPA, ka trongtrai ngaithla la,
Ka hnǐna mi lo hrepek la,
Ka trap ri lo ngaithla hrâm rawh.
Ka pi le puhai ang bokin,
Kei khuolzin hin ka hung bĕl che,
Sawt nâw tè chauh châm ding ka nih.
13 Liem hmanga ka bo song hma hin,
Hlim taka ka um theina din,
I hmêl inthim mi’n hmutir naw.