Damnaw trongtraina
Davida inpakna hla.
38
1 Aw LALPA, i lungsen pumin,Nangin mi zilhau ngai naw la,
Lungpuom lai mi thunun naw rawh.
2 I thal chun a mi sun tlang a,
I kut ka chungah a tla hi.
3 I lungsen leiin ka pum hin,
Dam ni réng rèng a hmu ta nawh;
Ka suol leiin ka rù le châng,
A sil na thrèm thrûm vong a nih.
4 Ka rǐtlonan ka lû a bûk,
Phur ruol loin a rik a nih.
5 Ka thilthaw indik naw leiin,
Tirdakum khopin ka pânna,
A mi huoisuolpĕk a ni hi.
6 Na tuorin ka kûn tlok tlok a,
Sŭnni thlâk beidongin ka’n rŭm.
7 Ka kâwng băwr a sa vut vut a,
Ka taksa bung tinrêng lai hin,
A damna lai hrim a um nawh.
8 Ka chău a, ka zoi letdĕr a,
Lungril sahâlin ka’n rŭm ie.
9 LALPA, ka lungkham i hriet vong,
Ka beidong inthuok rî chenin.
10 Ka lungphû a chawmchawrok a,
Thâ nei loin ka zoi dĕr a,
Ka mithai khom a’n thim zo tah.
11 Ka pân leiin ruol le paiin,
Hnaih khom an mi hnaih nuom ta nawh;
Ka khuo le vĕnghai chen khomin,
Hla takah an min kiengsan tah.
12 Ka hringna la tumtuhai chun,
Ka ăwkna dingin châng an kam,
Mi suknat tumtuhai khomin,
Ka siet tuok ding thu ngot hrilin,
Sŭnni thlakin an mi phier rûk.
13 Kei hlak chu nasêt, hre thei lo,
Trong thei lo le bău phong thei lo
Ang hlol el ka lo ni ta si.
14 Mithi, ieng khom hre thei ta lo,
Mi don dinga bău phong thei lo,
Ang hlol el ka lo ni ta hih.
15 Nang chauh a nih ka nghak, LALPA,
Mi don ngei rawh, LALPA Pathien,
16 Ka tlŭk leia hmêlma diriem,
Mi uongkhum ding phal lul naw rawh.
17 Ka natnain a mi’n thlà nawh,
A tlu lêng lêng chauh ka ni hi.
18 Ka bawsietnahai ka’n puong a,
Ka suol leiin poi ka ti hle.
19 San um loa mi theidatu,
Ka râlhai hi an hrohrâng a,
Indik loa mi dotuhai,
A tam khom an lo tam kher el!
20 Anni rawi hi ka thil thra thaw,
Suola thungrultu chu an na,
Thil thra ka bawzui pei leiin,
An mi theida èm ém a nih.
21 Aw LALPA, mi thlàthlam naw la,
Aw ka Pathien, mi’n hlat naw rawh.
22 Aw ka LALPA le Sandamtu,
Mi san dingin hung inhmaw rawh.