Mi suol le mi thra chan ding
Davida ta
37
1 Thil suol thawtuhai leiin,I lungril sukhnûr naw la,
Thil dik lo thawtuhai chu,
Inhnarin thîk bok naw rawh.
2 Hlo angin vuoi vak an ta,
Hnà angin rêm vak an tih.
3 LALPA ringa thil thra thawin,
Hi rama hin khawsa la,
A muong himna chu tlăn rawh.
4 LALPA-ah hlimin lawm la,
I duaisăm pe’ng a che.
5 I um dăn ding lampui chu,
LALPA-a chun innghat la,
Ama chu ring nghet tlat la,
Hieng hin thawpêk a ti che:
6 Zîng ni angin i felzie,
Hung invar suoktir a ta,
I ngirhmun indikzie khom,
Sun chang angin var a tih.
7 LALPA hmaah to zingin,
Ama chu nghak fan fan rawh.
Mi suol an hlawtling lei dam,
An suol phier an hlen lei dam,
I lung sukna dêr naw rawh.
8 Lungsenna hi bansan la,
Lungturûk insuo sim rawh;
Insuklunghnûr nuom naw rawh,
Suol tieng chauh mi a thruoi hlak.
9 Mi suol săt thlâk ning an ta,
LALPA beiseituhai chun,
Ram hi la rochung an tih.
10 Sawt naw te chauh hnunga chun,
Mi suolhai bohmang an ta,
Anni chu zong zong la khom,
Hmu zo tawl ta naw ti nih.
11 Zainemhan ram hluong an ta,
Muong takin khawsang an tih.
12 Mi suolhan mi fel an phier,
Ha an răwt khum suot suot hlak;
13 LALPAN mi suol a nuizat,
An tăwp a hnai ti a hriet.
14 Pasiehai sietna ding le,
Mi ngîlhai sukhlumna di’n,
Mi suolhan kawlhnâm phawiin,
An thalpui an kuoi kŭr hlak.
15 Sienkhom an kawlhnăm ngei chun,
Anni lung dâwt tlang a ta,
An thalhai tliek vong a tih.
16 Mi suol hausakna nĕkin,
Mi fel thil nei tlâwmte chu,
A thrain a hlu lem si.
17 Mi suol thilthawna kut chu,
Suktliekin la um a ta,
LALPAN mi fel a tungding.
18 Dem kai ngai lo mihai chu,
LALPAN a hriet kim vong a,
Rochan nei kumkhuong an tih.
19 Hun khirah muolpho naw nih,
Trăm kum khom an hnienghnar hlak.
20 Mi suol chu an bohmang a:
Mit khap kar loa phŭl mawi,
Meia a zâm ral angin,
LALPA hmĕlmahai khom chu,
Mei khu ang an zăm ral hlak.
21 Mi rilohan an pŭk a,
An rul nawk ta ngai naw a,
Mi felhan tiktlai takin,
An pĕk suok zing hlak a nih.
22 LALPAN mal a sawmhai chun,
Ram hi hluo’n rochung an ta;
Trongsie a’n phurhai ruok chu,
Săt thlâkin la um an tih.
23 LALPA ditzawng thawtu chu,
A kalchâwi a sukhrat hlak,
24 A’n sui châng khom tlu naw nih,
LALPAN a chel nghet si a.
25 Naupang ka ni lai a’nthok,
Ka tar kûn hnung chen khom hin,
LALPAN mi fel a thlathlam,
Ka la hmu hrim hrim naw a,
An nauhai kutdaw lai khom,
Ka la hmu hrim hrim bok nawh.
26 Thilpêkah an tik a tlâi,
A thlawnin an inpŭktir,
An suon le parhai khomin,
Malsawmna an dong pei hlak.
27 Suol bànin thil thra thaw la,
Ram hi hluo kumkhuong i tih.
28 LALPAN indikna a lawm,
A ta dinga ringumhai,
A maksan ngai hrim hrim nawh.
Chatuonin hum tawl a ta,
Mi rilo thlahai ruok chu,
Sàt thlâkin um vong an tih.
29 Mi felhan ram hluong an ta,
Chu chun cheng kumkhuong an tih.
30 Mi felin thuvar an hril,
An bau suok thu a’n lài hlak.
31 Lungrilah Pathien dânhai,
Ieng lai khom an vong tlat a,
An sir khom a’n phet ngai nawh.
32 Mi rilo chun that tumin,
Mi fel a’n chân rŭk hlak a;
33 Sienkhom, mi rilo kutah,
LALPAN a maksan ngai nawh;
Rorêlnaah khom thiem naw,
An inchangtir a phal nawh.
34 LALPA chu nghâk zing hlak la,
A lampui chu hraw hlak rawh.
Chuongchun chawi sâng a che a,
Ram inrochungtir a chê;
Mi suolhai a sât thlàk pha,
Mit ngeiin la thlîr i tih.
35 Mi suol tawrot ka hmu a,
Tuoltro thing ang a’n buk hlŭp.
36 Ka sir nawk, a um ta nawh,
Ka zong vêl, ka hmu ta nawh.
37 Dem kai lohai ngaituo la,
Mi ngîlhai nun bǐ chieng rawh;
Inremna dittuhai chun,
Suon le par an thla ngei hlak.
38 Bawsetuhai ram an ta,
Suon tieng zîk bûl bok an tih.
39 Mi felhai sandamna chu,
LALPA-a inthok a na,
Ama chu harsat ni a,
An bĕlbul kul nghet a nih.
40 LALPA chun a thrangpui a,
Aman a san suok tawl a,
Ama chu an bĕl leiin,
Mi suol lakah a san him.