Mihriem suolzie le Pathien thratzie
Lalpa siehlaw Davida ta.
36
1 Mi rilo lungril sunga chun,Bawsietnan a biekrŭk hlak a;
Pathien hang trìna san ding reng,
A mitin a hmu hrim hrim nawh.
2 A mitah a’n hmu mawi leiin,
A suolna chu hmu thei lo le
Theida phak ruol lo di’n a ngai.
3 A bau thu suok a rilo a,
Inhlèmna thuin a sip a,
Thil thra le var hrim a thaw nawh.
4 A khum laizawla hai chen khom,
Thil suol thaw ding a suongtuo a,
Suol lampui hraw a tum tlat a,
Suol theidăna hrim a nei nawh.
5 Aw LALPA, i hmangaina chun,
Vànvêlhai khi a tong vong a,
I ringumnan van dum a tong.
6 I felna chu tlâng ang lienin,
I’n dikna lipui ang a’n thûk.
Mihriem le ramsa tinrênghai,
Aw LALPA, i humhal hlak si.
7 I hmangaina chuoi ngai lo chu,
A hlutzie inkhi ruol an nawh!
Mi lien mi chînhan i thla hnuoi,
Bêl dingin an hung pan hlak che.
8 I ina i hnienghnârna chu,
Tlai takin an hung tlăn hlak a,
Lawmna fiertui i’n dăwntir hlak.
9 Nang chu hringna tuikhur i na,
I varah hringna var kan dong.
10 Nangma hretuhai chunga chun,
I hmangaina thla zâr khum la,
Lungrila mi ngîlhai chungah,
I felna inlangtir pei rawh.
11 Chapohai mi sir sop ding le,
Mi rilohai mi vai lĕng ding,
Nangin phalpêk hrim hrim naw rawh.
12 En ta, mi suol ruol an tlu saw,
An inthal dĕr, an tho ta nawh!