Thrangpui ngênna trongtrai
Davida ta.
35
1 LALPA, mi beituhai bei la,Mi dotuhai hi do ve rawh.
2 I phaw chawi a, awmphaw hâkin,
Mi thrangpui din hung inthok rawh.
3 Fei inlet a, kawlhnâm phâwiin,
Mi hnottuhai lo dang tlat la,
“I sandamtu ka nih” tiin,
Nangin ka thla hi hung huol rawh.
4 Mi that tumtuhai inzakin,
Sukmuolphoin um hai sien la,
Ka sietna ding phiertuhai chu,
Chi-âiin tlanse hai sien la,
5 Thli lên hmang bu sî ang elin,
LALPA angelhan hâwl hmang sien;
6 Thimtham le lampui innălah,
LALPA angelhan hnot raw se.
7 A san boin ka’n awkna di’n,
Lĕn châng arûkin an kam a,
Ka tlăkna di’n tlâkpŭm an cho.
8 Sietnan anni nang thut tawl sien,
An chăng kamah inâwk hai sien,
An tlăkpŭmah tla hlum raw se.
9 Chuongchun, LALPA-ah lawm ka ta,
A sandamnaah hlim ka tih.
10 Ka lungrilin LALPA kuomah,
“LALPA, nang ang tu’m an um a?
An ngam lo mi hrâthai lakah,
Mi retheihai i san suok a,
Mi rimsi le pasiehai khom
An neihai rokpektu lakah,
I hum bok a” ti thei ka tih.
11 Hrepuitu der râwng tak an hung,
Ka hriet lo thilah an mi săl;
12 Ka thil thra thaw tahai po po,
Suolin an mi thungrul vong a,
Ka thla a va’n vai ngei de aw!
13 Kei chun an damnaw chang khomin,
Saiip sila bu nghei hielin,
Kûn zingin ka trongtraipek hlak.
14 Ka hnǐna don a ni naw pha,
Ruol le pai lû sûn ang el le,
Mani nû ngèi sûn ang hielin,
Lungngaiin ka kûn tlok tlok hlak.
15 Anni ruok chu ka’n sui thlŭk pha,
Hlimin an inhăwr khawm lem a,
Mi bei hron din an pung khawm a;
Hmêl hriet lo misuolhai chenin,
Mi dem le suosăm an ma nawh.
16 Zàpà nei loa mi nuisaw’n,
Hä an mi răwt khum suot suot a.
17 LALPA, ieng chen am anni hi,
I en thei tawl zing ding a na?
Ka hringna hi keipui anga
Suosămtu lakah san suok rawh.
18 Pungkhawm ropui tak hmaa chun,
Lawmthu hril ngei ka ti che a,
Mipui lai inpâk ka ti che.
19 Mi sukse tum hmêlmahai chun,
Mi diriem ta naw raw hai se.
San boa mi theidatuhan,
Mit mi lir khum ta naw raw se.
20 Inremna thu an hril ngai nawh,
Thukhêla khuo le tui thrahai,
Hêk siet dan ngot an phan rŭk hlak.
21 An bău inzà huoua phongin,
“Eheu! Eheu! ei mit ngeiin,
Ei hmu annawm!” ti’n an hril hlak.
22 Chu chu LALPA, i hmu zing a,
Chuleiin, tosan tawl naw la,
LALPA, nangin mi’n hlat naw rawh.
23 Tho la, mi san din inthok la,
LALPA Pathien, mi dopêk rawh.
24 I felnain thiem mi’n chang la,
An mi diriem phal lul naw rawh.
25 “Ei duthusam a tlung tah ie,
Ei tukdol zo dêr an tah hi”
An mi ti ding phal lul naw rawh.
26 Ka chan siet mi diriemtu chu,
Inzakin chî-ăi hai sien la;
Mi uongkhumtu po po khomin,
Muolphona puon sil raw hai se.
27 Ka thiem changna lawmtu ruok chu,
Lawm le hlimin khêk suok hai sien,
“A siehlaw chan thratna dittu,
LALPA ropui sien” ti raw se.
28 Chuongchun, i’n dikzie hril ka ta,
Sŭnni tinin inpâk ka che.