LALPA hmangaina chul lo
Davida inpakna hla.
31
1 Aw LALPA, nang ka hung bĕl che,Ka muolpho ding phal lul naw la,
I ringum a, mi hum him rawh.
2 Ka tieng hin i nä hung daw la,
Mi san di’n hung inthok nghal rawh;
Ka’n bǐkna lungpui nang ni la,
Mi sanhimtu kul nghet ni rawh.
3 Ka lungpui le ka kul i na,
I hming leiin mi kei-thruoi rawh.
4 Nang ka’n bǐkna i ni leiin,
Ka ăwkna dinga an kam rŭk,
Chânga inthok chun mi’n suo rawh.
5 I kutah ka thla ka’n koltir,
Aw LALPA le Pathien ringum,
Nangin mi hung intlan suok rawh.
6 Mi lim tlâktlài lo behai chu,
Nangma theida zawng tak an nih,
Kei chu LALPA ringtu ka nih.
7 I ngilneina chuoi lo leiin,
Kei chu hlimin lawm ka ta,
Ka tuor inrimzie i hmu a,
Ka lungril beidongzie i hriet.
8 Hmelma kutah mi’n hlàn loin,
Hmun thawvengah i mi’n thrut si.a
9 Ka bei a dong a nih LALPA,
Ka chunga hin za hung ngai rawh.
Lungngai leiin ka mit a’n vai,
Ka taksa le ka lungril khom,
Beidongin an lo châu zo tah.
10 Lungngainan ka nun a tuom vel,
Inrŭmnain hun ka hmang zo,
Tuor rim leia ka thâ chăuin,
Ka rù le châng a rop zo tah.
11 Ka hmêlmahai leiin kei chu,
Vênghai nuizat bŭr kan ta a,
Ka hmêlhriethan an mi tri a,
Tuolah an mi hmu châng khomin,
Mi hêlin an mi’n relsan hlak.
12 Thi tah angin an mi’n nghil tah,
Pil bêl koi dar ang chauh ka nih.
13 An mi dem siet dan khom ka hriet,
Sîr tinah tritnan a mi’n huol;
Ka chungah thu an phierrûk a,
Mi sukhlum dan ding an rêl hlak.
14 Sienkhom, ka ring che, aw LALPA,
Ka Pathien i nih ti ka puong.
15 Ka hunhai i kutah a um,
Ka hmêlma le mi’n huoltuhai
Lakah nangin mi san him rawh.
16 I siehlaw chungah hmangaina
Hmêl mawi chu hung inlangtirin,
Lunginsietin mi san him rawh.
17 LALPA, ka hung ko che a nih,
Nangin mi sukmuolpho lul naw.
Mi suolhai chu sukmuolpho la,
Seolahb inliemtir diel rawh.
18 Chapo tak le hmusit taka
Mi indik trong khumtuhai le
Khêl hril hmanghai hmŭr khârpek rawh.
19 Nangma trituhai ta dinga,
Thratna i khawlkhawm zozai hi,
A lo va tam nasa de aw!
Chuonghai chu mihai hmû ngeiah,
Nangma bêltuhai i vŭr hlak
20 Mihaiin an phierruk chângin,
I ângsûngah i hum him a,
Khêla an hril siet bor bor châng,
I bûk sŭngah i thup tlat hlak.
21 LALPA inpâkin um raw se,
Khawpui anga râl mi’n huol lai,
A hmangaina mak chuoi lo chu,
Ka chungah a’n langtir si a.
22 “I hmu phak loah an mi hnot”,
Thlabârin ka ti hman hiel a;
Sienkhom, i thrangpui ka hni chun,
Nangin i mi lo ngaithlak hlak.
23 Aw, nangni a mi thienghlimhai,
LALPA Pathien chu hmangai ro,
LALPAN mi ringum a huolhim,
Chapohai a thungrul kim hlak.
24 LALPA nghaktu po pohai chun,
Insukhrâtin insukhuoi ro.