Lawmthu hril trongtraina
Tempul inhlân laia Davida hla.
30
1 Aw LALPA, chawimawi ka ti che,Thlăn khur a’nthok i mi san suok,
Hmêlma mi diriem i phal nawh.
2 Aw ka LALPA le ka Pathien,
Mi thrangpui di’n ka ko che a,
Nangin i mi lo sukdam tah.
3 Seol a’nthok mi la suokin,
Khurpuia ka tlàk phal loin,
Aw LALPA, i mi san suok tah.
4 LALPA hming thienghlim inpâkin,
A mi thienghlimhai, hlâ sak ro.
5 A lungsenna a ré vat a,
A ditsaknan dam sûng a daih.
Zănah mitthli hul naw sien khom,
Zǐngkar hlimna a tlung nawk hlak.
6 Ka hang hnienghnâr ve chang hin chu,
“Inhnîng ngai naw ning” ka ti hlak.
7 LALPA, i lungsietna leiin,
Tlâng angin i mi suknghet a;
Sienkhom i hmêl i hang thup chun,
Ka chí-âi nawk el hlak si a.
8 LALPA, nang i nih ka ko che,
I zangaina ka hnih, LALPA;
9 Siet tuokin thlănah lo zăl lang,
I ta din hlawkna iem a um?
Pilvutin inpâk thei a che’m?
I ringumzie puong thei a ti’m?
10 LALPA, mi lo ngaithla hrăm la,
Lungsietin mi san rawh, LALPA.
11 Ka trap hi lăm inchangtirin,
Ka saiip sil mi hlîppĕkin,
Lawmna puon i mi’n bel lem tah.
12 Chuongchun to zing loin lawm hla,
Ka lungrilin rem tang a ta;
Aw LALPA, ka Pathien i nih,
Inpâk kumkhuo ta’ng ka ti che.