Lungngaina le inpâkna
Davida inpakna hla.
‘Vartien sazuk hla’ thlûka sak ding.
22
1 Aw ka Pathien, aw ka Pathien,Ieng dinga i mi zamsan am?
Thrangpui ngaia ka’n rûm lai hin,
Ieng leia mi’n hlat am i na?
2 Sŭnah ka ko che, ka Pathien,
Sienkhom i mi don naw a,
Zănah ka to thei bok si nawh.
3 Nang chu Mi Thienghlim i na,
I lalthrungphaah i’n thrung a,
Israelha’n an inpak hlak che.
4 Kan pipuhan an ring che a,
An ring lei che’n i san suok a,
5 An ko che a, i san him a;
Nangmaah chun an innghat a,
Muolphoin i siem ngai naw khah.
6 Kei ruok chu chokchawnal ang chauh,
Mihriem lai khom zêl tlâk ni lo,
Mi biek răwp le endong ka nih.
7 Mi hmu photin an mi nuisaw,
An lu thinin an mi’n sietkhum:
8 “LALPAA innghat mi a na,
Aman hung san suok raw se chu;
Ami ditzawng hlak mi annawm,
Hung san suok raw se chu!” an tih.
9 Sŭl a’nthoka mi la suokin,
Ka nu trànga ka’n bei angin,
I trângah i mi’n beitir a,
10 Ka hung pieng thlàka inthokin,
Nang chauh hi ka’n nghatna i na;
Ka nu sŭla inthok rêng khan,
Nang chauh hi ka Pathien i nih.
11 Buoina a hnâi, min hlat naw rawh,
Santu tu dang khom ka nei nawh.
12 Bawngchal huoiin an min huol vel,
Basan bawngchal kol tak hai chun;
13 Sakeibaknei hnukrawl angin,
Bâu sen huouin an min ngur khum.
14 Tui bun thlak ang ka ni tah a,
Ka rù le châng an pelsol zo,
Ka lungril hlak khuoihlu angin,
Ka sungah a’n tui ral zo tah.
15 Pil bêl koi hàr angin ka danga,
Inhilin a châr zo ta a,
Ka dangah ka lei a kop a,
Thina vutah i mi’n buoltir.
16 Uichohan an mi kîl tuou a,
Mi suol honin mi’n huol velin,
Ka kut le ke an sun chor chor.
17 Rŭ khât ringot ka ni tah a,b
Diriem takin an mi endong.
18 Ka silfenhai an insem a,
Ka zakuo di’n thrum an vawr ie.
19 LALPA, nang chun min hlat naw la,
Aw ka Hratna, mi san dingin,
Hung inthok inhmaw ta raw khai!
20 Kawlhnâm lakah mi hung san la,
Aw ka hringna hlu tak el hi,
Uichohai laka hin hum rawh.
21 Keipui bau a’nthok mi hum la,
Tumpâng ki zum a’nthok khomin.
22 Unauhai lai i hming hrilin,
Pungkhawmnaah inpâk ka che.
23 LALPA trituhai, inpak ro,
Jakob thlahai, chawimawi seng ro!
Israel thlahai, inza ro.
24 Sirdèna tuor a diriem nawh,
Ama chu a tirdak bok nawh,
A lakah a hmêl thup loin,
Thrangpui a ngênin a ngaithlak.
25 Pungkhawm hmaa kan pâkna che,
Ka zaihla nang a’nthok a na,
Nangma trituhai hmaa chun,
Ka thutiemhai hlen bok ka tih.
26 Retheihan tlai takin fa sien,
LALPA zongtuhan inpak sien-
In lungril dam kumkhuo raw se.
27 Hnuoi kil tinah LALPA hrein,
A kuom tieng hung kir nawk an ta,
A hmaah hnam tinhai kûnin,
Ama chu hung chawibiek an tih.
28 Lalna chu LALPA ta a na,
Hnam tin chungah ro a rĕl hlak.
29 Hnuoi hausakna tlântu po po,
A hmaa chun hung kŭn an ta,
Inchawm hring zo ve lohai le
Pilvuta kir el dinghai khom,
A hmaah la kûn vong an tih.c
30 Thrangtharhan a rong bawl an ta,
An thlahai lai khom LALPA thu,
La hung hril zui pei bok an ta,
31 A mihai a san suok dan hi,
Thrang la thar peihai kuoma khom,
Hrilin la hung um pei a tih,
A thawpek tawl takzet si a.