Hnĕna chunga inpâkna
Davida inpakna hla
21
1 I hràtna leiin LALPA,Lal chu a hlim êm êm a,
Hnèna i’n khumtir leiin,
A va hang lawm nasa ngei!
2 A ditzawng i pêk pei a,
A hnî phot i sêl ngai nawh.
3 Malsawmna tama hmuokin,
Rangkachak hlîr hlaka siem,
Lallukhum i’n khumtir a.
4 Hringna a hnih, i lo pêk,-
Kumkhuoa damna nawknghal!
5 Hnèna i’n changtir zàrin,
A hung ropui ta hle a;
Ropuina le chawimawina,
Tonlairang i’n khumtir si.
6 Chatuon malsawmna vûrin,
I hmêlin i suklawm hlak.
7 Lal hin LALPA a ring a,
A Chunghnungtak hmangaina,
Chul ngai hrim hrim lo zârin,
Inhnîng ngai hrim hrim naw nih.
8 Hmêlmahai chu i kutin,
An rêngin dap suok i ta,
Chang tiengin man khâwm i tih.
9 I hung pha thuk inlingah
Anni chu pei hmang i ta,
I lungsenna chun LALPA,
Anni chu lem zo a ta,
Mei chun kâng hmang vong a tih.
10 Hnuoi a’nthokin an thlahai,
Sukchimitin um an ta,
An tu le tèhai khom chu,
Mihriem lai tiem naw ni hai.
11 I lakah suol thaw tumin,
Phierruk ieng ang hai sien khom,
An tum hlawtling naw ni hai.
12 I thala i tin pha chun,
Tukkhum sonin tlân an tih.
13 LALPA, i hràtna leiin,
Nang chu chawi sangin um la,
I thilthawtheina ropui,
Inpâkin hla sak kan tih.