Hnè dinga hnina
Davida inpakna hla
20
1 Lungzîng niin LALPAN don sien che,Jakob Pathien chun hum che raw se.
2 Hmun thienghlima inthok hung sanin,
Zion a’nthok thrangpui che raw se.
3 I thil inhlànin hriet zing hlaw sien,
I pumraw thilhlan lo pom raw se.
4 I lungril ditzawng pe sien la che,
I thil tumhai hung hmûingil raw se.
5 I hnè pha leh lawmin khêk kan ta,
Pathien hmingin puonzâr khai kan tih.
I hnì phot LALPAN pe raw se che.
6 A hriek nàl chu LALPAN a hum hlak,
Ti tuhin chu ka hung hriet ve tah;
A san suokna kut chang tieng ngei chun,
A vàn thienghlim a’nthok a hung don.
7 Threnkhatin tawlailir an ringsan,
Threnkhatin sakor an ringsan bok,
Keinin LALPA Pathien hming kan ring.
8 Chuonghai chu tlepin tlu thal an ta,
Keini chu thoin ngîr nghet kan tih.
9 Aw LALPA, lal hi hung san him rawh!
Kan ko pha che mi hung don ngei rawh.