Poi tawk lo trongtraina
Davida trongtraina
17
1 LALPA, ka’n dikzie hrein,Ka hnǐna rawl lo ngai tâm!
Ka trongtraina ngaithla rawh,
Hmŭr khêlhlipa suok an nawh.
2 Ka thiemzie tarlangna chu,
Nangma a’nthok ngei ni sien,
I mit ngeiin mi’n chieng rawh.
3 Zàna chen khom mi fiein,
Ka lungril hi hung dapin,
Mi enfie vong khom ni la,
Ka suolna hmu naw ti nih-
Ka hmŭr inkhap suol naw nih.
4 Mihai thilthaw chungchàngah,
I bau suok thu chu zawmin,
Inpawngnêk ka chîng ve nawh.
5 I lampuiah kal chawiin,
Ka sir khom a’n phet ngai nawh.
6 Aw LALPA, ka ko ché hin,
Nangin mi hung don ngei la,
Ka tieng i ná hung dawin,
Ka hnǐna lo ngaithla rawh.
7 I hmangaina chul lo chu,
Mak takin mi’n hmùtir rawh,
I chang tieng hung bĕltuhai,
Hmêlma lakah i hum hlak.
8 I mit naulêng ang elin,
Nangin mi vêng him tlat la,
I thla hnuoiah mi thup rawh-
9 Mi rilo, mi beituhai,
Ka vêla mi’n huol khumtu,
Doral trium laka chun.
10 Lunginsietna an nei nawh,
An bau suok a chapo bok;
11 Ka hnung an hung sui suok a,
Tu hin an mi’n huol khum a,
Mi thè thlûk dan an melkai.
12 Sakeibaknei ang boka,
Mi pot chen ve vong châkin,
Keipui angin an mi’n chân.
13 Aw LALPA, nang hung tho la,
Hmasonin suktlawm tawl la,
Mi rilohai laka hin,
I kawlhnâm chun mi humin,
Ka hringna hung san suok rawh.
14 Aw LALPA, ka hringnun hi,
Hi khawvel dam sûng huna,
Lawmman beiseituhai lakah,
Nangman hung san suok hràm rawh.
I ditsak mi taphot chu,
An phîngpui i hrâi tlai a;
An nauhai an hnienghnàr a,
An suonhai ta ding chenin,
Hausakna an khawl khawm hlak.
15 Kei ruok chun felna leiin,
I hmêl chu la hmung ka ta;
Nangma angna chu neia,
Ka thranghar hun ve pha chun,
Lungawi takzet ta’ng ka tih.