Indik taka rorel dinga ngênna
10
1 Aw LALPA, iengtizie hrim a,Ka beidong mangang nikhuo hin,
Hla takah i’n bi hmang dai am?
2 Mi rilo chun chapo takin,
Hrâtnawhai chu sâ ang pêlin,
A châng kam rŭkah a’n awktir.
3 A lungril châkzawng uongpuiin,
Duâm taka hlawkna hnotin,
Pathien hnawlin trongsie a’n phur.
4 Mi rilo chu a chapo a,
Pathien hrim a zong ngai naw a,
A lungrilah Pathien ta di’n,
Hmun hrim hrim an kien ve ngai nawh.
5 A tum lam a hlawtling rop a,
Chuleiin a uongthuong hle a;
I dàn leh an inhnai naw a,
A hmêlmahai a’n siet khum hlak.
6 “Ieng khomin mi sukchâng naw nih;
Buoina ieng khom tuok ngai loin,
Hlim zing ka tih” a ti lungril.
7 Trongsie le khêl, inthrìna hai,
A bâuin a sâk suok zing a;
A lei hnuoia chun suolnain,
Buoina bupui bû a khuor a.
8 Khawhnawmah mi a’n chăn rŭk a,
A rûkin mi a pêl zing a,
Poi tawk lohai chu a phil hlak.
9 Keipui angin a’n chàn rŭk a,
Santu nei lohai chu manin,
A lèn sungah a hnûk lŭt hlak.
10 A manhai chu an op rop a,
A hràtna chun a sop hné si.
11 A lungrilin hieng hin a tih:
“Pathienin a hriet fŭk ta nawh;
A hmai a hup, a hmu teu nawh.”
12 LALPA, tho la, aw ka Pathien,
I kut zuk lek khum hràm raw khai!
Santu nei lohai nghil naw rawh.
13 Ieng leia mi rilohaiin,
Pathien an deusaw am a na?
“A maw mi’n phurtir teu naw nih”,
Ieng leia an ti lungril am?
14 Aw Pathien, nang chun i hmu a,
Buoi mangang tuokhai i’n chik a,
Thrangpui dan i ngaituo hlak.
Tuorhai inhnèmna tak i nih,
Fahrahai santu i ni si.
15 Mi suolhai băn suktliekpek la,
An suolhai a rù inlangin,
Nangin hung phor suokpek vong rawh.
16 LALPA chu kumkhaw Lal a na,
A ram a’nthok hnam danghai chu,
An la bohmang vong ding a nih.
17 Nèksawrhai thil hni chu LALPA,
Nangin lo ngaithlapek hràm la,
Anni tieng nghaa na dawin,
An lungril hung sukphûrpek rawh.
18 Fahrahai le neksawrhai chu,
Hnuoi mihriemhai lai tu khomin,
An hrawk thlabâr ta nawna di’n,
Nangman sanin hung huol him rawh.