A rorêl indik leia lawmthu hrilna
Davida inpakna hla. Tringtrang ri
fiek le thûma rema sak ding.
9
1 Ka lungril po poin LALPA,I kuomah lawmthu hril ka ta,
I thilmak thawhai puong ka tih.
2 Nangmaah lawmin hlim ka ta,
I hming chawimawia zai remin,
Aw Chunghnungtak, inpâk ka che.
3 I hmaa chun ka hmêlmahai,
An tlànse a, an tlu hlum zo.
4 Ka thrangna tieng i mi tran a,
I lalthrungphaa inthrungin,
Indik takin ka thu i rèl.
5 Hnamhai chu zilin i kawk a,
Mi suolhai i sukbohmang a,
An hminghai khom kumkhuoa di’n,
I thai bopek tawl ta si a.
6 Kumkhawtluonga se song dingin,
Hmêlmahai i sukbohmang a,
An khawpuihai i sukram a,
Tu hriet hlaw hrim an um ta nawh.
7 LALPA chu chatuon lal a na,
Rorêlna thrungpha a’n din nghet.
8 Felna’n khawvel ro a rèl a,
Indik le thlei bik nei loin,
Mi tin chungah ro a rèl hlak.
9 Nêksawrhai ta din LALPA chu,
An kulpui belbul tak a na,
Harsat huna kulbing a nih.
10 I hming hretu ringsan i na,
Nangma zongtu che chu, LALPA,
I thlathlam ngai hrim hrim si nawh.
11 Ziona thrung LALPA ta din,
Inpâkna hla chu sak unla,
A thilthawhai chu inzawtin,
Hnam tinrêng kuomah puong dar ro.
12 Thisen phuba la hlaktu chun,
Ngaivenin a hriet zing tawl a,
Tuorhai trap ri a’n nghil ngai nawh.
13 Aw LALPA, mi lunginsiet la,
Hmêlma kut ka tuor hi en ta!
Thìna kho tlânga inthokin,
LALPA, nangin mi san suok la,
14 Zion Naunua kotsuoa chun,
Ka’n pâkna san che puong darin,
I sansuokna chu lawm ka tih.
15 Hnamhai chu anni khur cho ngei,
Tlâkholah chun an tla lŭt a,
An lĕn chăng kam rûk ngei el chun,
An keah a awk tăng a nih.
16 Indik taka ro a rèlzie,
LALPA chun a’n hriettir hlak a,
Mi rilohai chu anni kam,
Chânga ngei chun an inawk hlak.
17 Mi rilohai chu Seolb tieng,
Pathien ngaisak lo hnamhai leh,
An rêngin kîr nawk diel an tih.
18 Retheihai thlathlam zing naw nih,
Tuorhai beisei thlawn song naw nih.
19 Aw LALPA, hung inthok suok la,
Mihriemhai ngamin um naw la,
Hnamhai chungah ro hung rêl rawh.
20 LALPA, anni sukthlabâr la,
Mihriem el an nizie thu hi,
Hnam tin kuomah inhriettir rawh.