Indik taka rorelpek dinga hnina
Davida inpakna hla. Benjamin
mi Kusa chungchanga Davidan
LALPA kuoma a sak
7
1 LALPA Pathien, ka hung bĕl che,Mi hnottu lakah mi hum rawh;
2 Keipui sa pet thlĕr ang elin,
Santu ding tu khom nei loin,
Mi kei nawi vong pal rawi an tih.
3 LALPA Pathien, hieng hi thaw a,
Ka kutin thil suol a tawk a,
4 Keima le inrema um ruol,
Suola ka thungrul a ni chun,
San boa hmêlma ka rok chun,
5 Ka hmêlmaha’n mi hnot thlûrin,
Mi hnot phâkin mi man hai sien,
Hnuoiah mi sir ziel hai sien la,
Ka ruong pilvut lai zâl raw se.
6 Lungsenin hung tho la, LALPA,
Hmêlma lungsen intûrhai hi,
Nangin mi zuk hrâwkpêk tâm leh!
Ka Pathien, nang hung inthok la,
An chungthu hi hung rêl ta rawh.
7 Mipui pung khawmhan i vêlin,
Inhuol tlim hmur hai sien la che,
Chung a’nthokin ro hung rêl rawh.
8 Mi tin rorêlpektu LALPA,
Ka felna phûin mi’n khì la,
Aw Chunghnungtak, ka ringum phŭ’n,
Ka chungthu hi mi rêlpêk rawh,
9 Felna Pathien, lungril hretû,
Mi rilohai tawrotna hi,
Nangman hung suktawppek vong la,
Mi felhai chu hung suknghet rawh.
10 Chung Pathien hi ka phaw a nih,
Mi nun ngîlhai a sandam hlak.
11 Rorêltu fel Pathien a na,
Mi suol chunga a lungsenna,
Ieng lai khomin a rè ngai nawh.
12 Tu khom sim nuom naw ta dingin,
A kawlhnâm tât ngei zing a ta,
A thalngul kuoiin tin a tih.
13 Thìna hriemhrei a buotsai a,
A thal chok thei khom a’n pei zing.
14 Suolna nâua pâituhai le,
Buoina nâua vontuhai chun,
Beidongna an hring suok ngei hlak.
15 Tlâkhol inthûk tak chotu chu,
A khur choah chun tlâng a ta,
16 A buoina siem chun vaw lêtin,
A nunrawngnan a lu bûr ngei,
A hung dêng lêt nawk hlak a nih.
17 A felna leiin LALPA chu,
Inpâkin lawmthu hril ka ta;
LALPA Chunghnungtak hming ngei chu,
Inpâkin lawm hla sak ka tih.