Himna dinga hnina
Davida inpâkna hla.
Theihlê le sak ding
5
1 LALPA, i nâ mi dawpêkin,Kan rùm ri hi lo ngaithla rawh.
2 Ka Laltak le aw ka Pathien,
Thrangpui ngaiin ka ko che a,
Ka hnìna lo ngaithla hrăm rawh.
3 LALPA, zingkâr ka ko che a,
Ka thil hnihai ka’n tlun hlak a,
Beisei takin ka nghak zing hlak.
4 Suol lawm Pathien i ni naw a,
Mi rilo leh i chêng thei nawh.
5 I hmaah mi uongthuong tû khom,
An hung inlang ngam ngai dêr nawh,
Thil suol thawhai i theida si.
6 Khêl hril chìnghai i sukram a,
Thisen insuo le hlĕm hmanghai,
I tirdak zawng an nih, LALPA.
7 I hmangaina chuoi lo zârin,
I inah hung inlăwi ka ta;
I tempul thienghlim tieng nghain,
Inză takin hung kŭn ka tih.
8 LALPA, ka hmêlmahai leiin,
I felnaah mi thruoi pei la,
Ka tluonglam mi siem ngílpek rawh.
9 An bâu thusuok mal khat tè khom,
Ring tlâk hrim hrim a um naw a,
An lungril sietna’n a sip a,
An hnuk chu thlan inhong a na,
An lei inpâk derna’n a’n khap.
10 Aw Pathien, thiemnaw inchang la,
An thil phier sietpui hai sien la,
An bawsietna zozai lei hin,
Anni chu pei suok dai tawl rawh,
I lakah an hel tlat si a.
11 Nangma bêltu ruok chu him sien,
Hlimna hla sak kumkhuo raw se.
I humhimna thla zâr khum la,
I hming dittuhai hlim an tih.
12 A nih, LALPA, mi felhai chu
Mathei loin mal i sawm hlak,
I ditsakna chun phaw angin,
Anni chu i’n huol vel zing hlak.