42
1 Chun, Joba chun LALPA chu a don a:2 “Iengkim i thaw thei ti ka hriet a,
I tum khom dàl thei a ni nawh.
3 ‘Tu am a na hrietna nei si loa,
Ka remruot kaltu hi?’ tin i’n don a.
Ni e, kei ngei hi ka’n nawm,
Ka hriet phak lo thilhai lo hril a,
Ka ta dinga mak ropui taluo,
Ka hriet phak ruol lo hriltu chu.
4 ‘Ngaithla rawh, hril ka che,
Thu indon ka ti che a,
Chu chu i don ding a nih’ i ta.
5 Ka na ringotin ka hriet ta che a,
Tu ruok hin chu ka hmu ta che a;
6 Chuleiin, keima hi ka’n tirdak a,
Vut le pilvutah thrungin ka sim”
tiin.
Thu khârna
7 LALPAN Joba kuoma chuong thu a hril zo chun Teman mi Elifaz kuomah, “Ka siehlaw Joba angin ka chungchang thu indik taka in hril naw leiin i chunga le i ruolhai pahni chunga khan ka lung a sen hle a nih. 8 Chuleiin, tu hin bawngchal pasari le beram chal pasari keiin ka siehlaw Joba kuomah fe unla, in ta dingin pumraw thilhlân va’n hlan unla, ka siehlaw Joba chun trongtraipek a ti cheu a, chu chu lo pom ka ta, in indik nawna angin in chungah thaw naw ning; ka siehlaw Joban a thaw angin ka chungchang thu indik takin in hril nawa chu” a ta. 9 Chuongchun, Teman mi Elifaz le Suha mi Bildad le Naamat mi Zofar hai chu Joba kuomah an va fe a, LALPAN thu a pĕk ang tak chun an thaw a, LALPA chun Joba hnina chu a lo pom a.
10 A ruolhai pathum ta dinga Joba a trongtrai hnung chun LALPAN Joba chu a sukhmuingil nawk a, a hmaa a nei lêt hni a pêk a. 11 Chuongchun, a unauhai le a farnuhai po po le kha hmaa a hmelhriet po po hai kha an hung a, a ina chun ruoi an kǐl tlăng a; LALPAN a chunga thil thra naw a’n tlungtirna chungah an tuorpui a, an thlamuong a, mi tinin tangkaruo kesitaa khat seng le rangkachak kutsebi an pèk a.
12 Chuongchun, LALPAN Joba hun nuhnung tieng chu a hmasa nĕka nasa lemin mal a sawm a, beram singkhat le sangli, sanghawngsei sangruk, bawngchal tuok sangkhat le sabengtungpui sangkhat a nei a. 13 Naupa pasari le naunu pathum a nei bok a. 14 A naunu upa tak hming chu Jemima a na, a pahnina chu Kezia a na, a pathumna chu Keren-Hapuka a nih. 15 Joba naunuhai anga hmêl thra a ram puma chun tu khom an um nawh. Joba chun a naunuhai chu an trăhai ang bokin rochan a siempek vong a. 16 Chuong lai chun Joba chu kum za le kum sawmli a ni ta a, a naupahai le a tûhai khûp li chen a hmu hman a. 17 Chuongchun, Joba chu ngal fîma damin, tar takin a thi ta a.