SAM
BU KHATNA
(Sam 1-41)
Hamthratna tak tak
1
1 Mi suolhai remruot zui ngai lo,Mi suolhai lampui hraw ngai lo,
Hmusittu lai thrung ngai lo chu,
Mi hamthra a va ni ngei de!
2 A lawmzawng LALPA dàn a na,
Sŭn le zănin a dawnkhawl hlak.
3 Tui luong zingna kama thing phun,
A hun taka rà insuo hlak,
A hnà vuoi ngai lo ang a nih.
A thilthaw phot a hmûingil hlak.
4 Mi suol ruok chu an ni ve nawh,
Thli lên dar bu sí ang an nih.
5 Chuleiin rorêlna hmaah,
Mi rilo dingchang naw ni a,
Mi felhai inthrung khawmnaah,
Hmun chang ngài hrim hrim naw ni hai.
6 Mi fel kalchawina lampui chu,
LALPAN a vengpèk zing hlak a,
Mi rilo lampui hraw ruok chu,
Bohmangnain a tawp hlak si.