Fiena pahnina
2
1 Ni khat dang chu Pathien hmaah vantirkohai an hung inlang nawk a, Setan khom chu LALPA hmaa inlang dingin anni lai chun a hung ve a. 2 LALPA chun Setan kuomah, “Khaw tienga inthoka hung am i na?” a ta. Setan chun, “Suk le tunga kan vàk vèlna hnuoia inthokin” a ta.3 LALPA chun Setan kuomah, “Ka siehlaw Joba hi i thlithlai hlak am? Ama anga dem kai lo, indik famkim, Pathien trî mi le suol laka inthier fihlim hi hnuoi chungah tu khom an um nawh. A san boa sukse a, ka laka hel dinga i cho phawk hnung khomin a ringumna a la vong tlat a nih” a ta. 4 Setan chun, “‘Vun aia vun’ ti a ni hlak rĕng annawm. Mi tu khomin hringna ta ding chun nei po po khom pe phal ngei naw ni hai! 5 Tu hin a chungah i kut thlâk la, a taksa le ru le chânghai ngei hang tawkpek rawh, i hmâisànah hril se nghal a ti che” a ta. 6 LALPA chun Setan kuomah, “Chuong an leh, a thra, ama chu i kutah ka pêk che. A hringna ruok chu hlà rawh” a ta.
7 Chuongchun, Setan chu LALPA kuoma inthokin a suok a, Joba chu a lua inthoka a kepha chenin pânsie na takin a’n bawmtir a. 8 A pang huotna dingin bêl koi hăr a lâk a, vut lai a thrung a. 9 A nuhmei chun a kuomah, “I ringumna chu chel tlat i la tum a ni? Pathien hril se la, thi law law la a ni el annawm” a ta. 10 Sienkhom, Joba chun a kuomah, “Nanga nu hi nuhmei intlaw, Pathien inzăna hrim nei lo trongin i trong a ni hi tie! Pathiena inthokin thil thrâ ei hmu ang bokin thil thra lo khom ei hmu sa ve naw ding am a ni?” a ta. Hieng po poa hin Joba chun thu indik lo a hril nawh.
A ruolhaiin an hung kan
11 Joba chunga thil thra lo a tlung thu a ruolhai Teman mi Elifaz hai, Suha mi Bildad hai le Naamat mi Zofar haiin an lo hriet chun tuorpui ding le thlamuong dingin an in senga inthokin a ruolin an hung pan khawm a. 12 Răla inthoka an hei hmu chun Joba a nih ti khom an hriet el thei ta naw a. Inring takin an trap a, an puonhai an pot thlĕr a, an luah pilvut an phul a. 13 A natna chu a’n rim èma an hriet leiin, to trokin ni sari le zăn sari hnuoia chun an inthrungpui a.